नेपाललाई १० वर्षभित्र साँच्चीकै विकासको गतितर्फ लैजान सक्ने सम्भावना छ : प्रचण्ड
काठमाडौं । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ ले नेपाललाई १० वर्षभित्र साँच्चीकै विकासको गतितर्फ लान सक्ने सम्भावना भएको बताएका छन् ।
राजधानीमा आइतबार आयोजित युवा समिट कार्यक्रमलाई सम्बोधन गर्दै उनले भने, ‘हामीले चाहेमा चमत्कार गर्न सकिन्छ । हामी राजनीतिलाई अब विकास र समृद्धिका लागि लाग्न सक्छौं । देशलाई १० वर्षमै साँच्चीकै समृद्ध बनाउन सक्छौं ।’
देशको आर्थिक स्थिति बलियो बनाउन कृषिमा आधारित उद्योगहरूको विकास गर्नुपर्ने उनको भनाइ थियो । देशको आर्थिक विकासको मुख्य मेरुदण्ड कृषि भएको बताउँदै प्रचण्डले भने, ‘पछाडि धकेलिँदै गएको देशको अर्थतन्त्रलाई बलियो बनाउन कृषिमा आधारित उद्योगहरूको विकास गर्नुपर्छ । कृषिपछि जलविद्युत, पर्यटन, जडीबुटी र खनिजको विकासले पनि देशको अर्थतन्त्रमा टेवा पुग्छ ।’
