करिम बेन्जेमा चुक्दा रियलको विजयी यात्रामा पूर्णविराम
काठमाडौं । १० खेलाडीमा सीमित ओसासुनाले साबिक विजेता रियल मड्रिडलाई स्पेनिस ला लिगामा १–१ को बराबरीमा रोक्न सफल भएको छ । करिम बेन्जेमाले पेनाल्टीबाट गोल गर्न चुकेपछि रियलले यो सिजन अंक गुमाएको यो पहिलो पटक हो ।
खेल १–१ को बराबरीको अवस्थामा रहेका बेला ८० औँ मिनेटमा बेन्जेमाले हानेको पेनाल्टी क्रसबारमा लाग्न पुगेको थियो । पहिलो हाफको अन्त्यतिर भिनिसियस जुनियरले रियललाई खेलमा अग्रता दिलाएका थिए । तर, दोस्रो हाफको शुरुवातमा नै किके गार्सियाले खेल बराबरी गरे ।
डेभिड गार्सियाले बेन्जेमालाई लडाएपछि उनले रातो कार्ड खाँदै मैदान छाड्न परेको थियो । रियलले पेनाल्टी पाए पनि त्यसलाई सदुपयोग गर्न सकेन । ७ खेलपछि रियल र बार्सिलोनाको समान १९ अंक भए पनि गोलअन्तरको आधारमा बार्सा शीर्ष स्थानमा रहेको छ ।
