तनहुँ १ : रामचन्द्र पौडेल एमालेका एकबहादुर रानासँग १३२ मतले पछि
तनहुँ । तनहुँ क्षेत्र नम्बर १ मा नेपाली कांग्रेसका वरिष्ठ नेता रामचन्द्र पौडेल एमालेका प्रतिस्पर्धीसँग पछि परेका छन् । सुरुवातदेखि अग्रता बनाइरहेका उनी पछिल्लो मत परिणामअनुसार नेकपा एमालेका एकबहादुर रानासँग १३२ मतले पछि परेका हुन् ।
जारी मतणनाका क्रममा अग्रता बनाएका रानाले ३३ सय ४२ मत ल्याएका छन् । उता दोस्रो स्थानमा धकेलिएका पौडेलले ३२ सय १० मत ल्याएका छन् । कुल ९ हजार ७५६ मत गणना हुँदा रानाले रामचन्द्रलाई उछिनेका हुन् ।
अर्कातिर राष्ट्रिय स्वतन्त्र पार्टीका विकास सिग्देलले १२ सय ९० मत ल्याएका छन् । त्यहाँ राष्ट्रिय प्रजातन्त्र पार्टीका विनोद घर्तीले ५२२ मत ल्याएका छन् । यस क्षेत्रमा एक लाख २३ हजार चार सय ९० मतदाता थिए । जसमा ६६ हजार नौ सय ६५ मत खसेको जिल्ला निर्वाचन कार्यालय तनहुँले जनाएको छ । यो ५४ दशमलव ३६ प्रतिशत हो । तनहुँ–१ प्रतिनिधिसभामा १० जना प्रतिस्पर्धामा छन् ।
