नेकपा एसका अध्यक्ष नेपाल र कांग्रेस नेता पौडेलबीच भेटवार्ता
काठमाडौँ । नेकपा एकीकृत समाजवादीका अध्यक्ष माधवकुमार नेपाल र नेपाली कांग्रेसका वरिष्ठ नेता रामचन्द्र पौडेलबीच भेटवार्ता भएको छ ।
आज (शनिबार) नेपाललाई भेट्न नेता पौडेल एकीकृत समाजवादीको पार्टी कार्यालय आलोकनगर पुगेका थिए । भेटमा दुई नेताबीच पछिल्लो राजनीतिक घटनाक्रमका विषयमा करिब एक घण्टा छलफल भएको थियो ।
पौडेलका स्वकीय सचिव चिरन्जिवी अधिकारीले नेता पौडेल र नेपालबीच भेटवार्ता भएको जानकारी दिए । ‘पछिल्लो राजनीतिक घटनाक्रमबारे भेटघाट भएको हो । प्रधानमन्त्रीलाई विश्वासको मत दिएको विषयदेखि सभामुख र राष्ट्रपति निर्वाचनलगायत विषयमा छलफल भयो,’ उनले भने ।
आफ्नै नेतृत्वको गठबन्धन जोगाउन नसकेको कांग्रेस नेताहरु फेरि माओवादी केन्द्रसँग सम्बन्ध सुधारेर गठबन्धन बनाउने प्रयासमा छन् । सभापति शेरबहादुर देउवाले पदाधिकारीहरुसँग छलफल गरी सभामुखको निर्वाचनमा बहुमत जुटाउन अन्य दलसँग छलफल र सहकार्यको प्रयास गरिरहेका छन् । नेताहरुका अनुसार देउवाले त्यसका लागि नेता पौडेललाई पनि सक्रिय बनाएका हुन् ।
