बालुवाटारमा गठबन्धनको वैठक जारी, प्रभु साह पनि सहभागी
काठमाडौं । उपराष्ट्रपतिको उम्मेदवार टुंगो लगाउन १० दलीय गठबन्धनको बैठक चलिरहेको छ । प्रधानमन्त्री निवास बालुवाटारमा १० दलीय गठबन्धनको बैठक बसेको हो । यसअघि गठबन्धनमा नौं दल सहभागी भएको थियो ।
यस पटकको बैठकमा भने प्रभु साह पनि बालुवाटारको बैठकमा पुगेका छन् । साह अध्यक्ष रहेको आम जनता पार्टी थपिएपछि १० दलीय गठबन्धन बनेको हो । २०७९ साल मंसिर ४ गतेको प्रतिनिधिसभा निर्वाचनमा रौतहट क्षेत्र नं. ३ बाट स्वतन्त्र उम्मेदवारी दिएका प्रभु साह निर्वाचित भएका थिए ।
उनले निर्वाचित भएपछि नयाँ पार्टीको नाम आम जनता पार्टी राखी निर्वाचन आयोगमा दर्ता गराएका थिए । उपराष्ट्रपति निर्वाचन, उम्मेदवार चयन र पछिल्लो राजनीतिक घटनाक्रमबारे छलफल भइरहेको प्रधानमन्त्रीको सचिवालयले जानकारी दियो ।