एसीसी प्रिमियर कप : नेपालले पहिले बलिङ गर्ने
ज्ञानेन्द्र मल्ल, करण केसी र प्रतिश जि.सी बेञ्जमा
काठमाडौँ । एसीसी प्रिमियर कप अन्तर्गत आज (मंगलबार) त्रिवि क्रिकेट मैदानमा हुने नेपाल र मलेसियाबीचको खेलमा मलेसियाले टस जितेर पहिले ब्याटिङ रोजेको छ । टस जितेर मलेसियाका क्याप्टेन हमद फैजले पहिले ब्याटिङ रोजेपछि नेपालले बलिङ गर्न लागेको हो ।
खेलमा नेपाल विजयी सुरुआतको लक्ष्यमा छ । टस हारेपछि पहिलो खेलमा मलेसियाविरुद्ध नेपालले फिल्डिङ गर्ने निम्तो पाएको छ । नेपाल क्रिकेट संघ (क्यान) ले प्रतियोगिताका लागि १४ सदस्यीय राष्ट्रिय क्रिकेट टिम घोषणा गरिसकेको छ ।
रोहित पौडेलको कप्तानीमा आइतबार घोषित टिममा कुशल भुर्तेल, आशिफ शेख, ज्ञानेन्द्र मल्ल, कुशल मल्ल, आरिफ शेख, सोमपाल कामी, दीपेन्द्रसिंह ऐरी, गुल्शन झा, करण केसी, सन्दीप लामिछाने, भीम सार्की, प्रतिश जिसी र ललित राजवंशी छन् ।
यस्तै, अर्जुन साउद, सन्दीप जोरा, सूर्य तामाङ र किशोर महतोलाई वैकल्पिक राखेको छ । आजको खेलमा ज्ञानेन्द्र मल्ल, करण केसी र प्रतिश जि.सी बेञ्जमा रहेका छन् । आजै मूलपानी क्रिकेट मैदानमा हुने खेलमा हङकङ र सिंगापुरबीच प्रतिस्पर्धा हुँदैछ ।
यस प्रतियोगितामा १० राष्ट्र सम्मिलित छन् । १० टिमलाई दुई समूहमा विभाजन गरेर खेलाइनेछ । समूह ‘ए’ मा आयोजक नेपालसहित मलेसिया, साउदी अरेबिया, कतार र ओमान छन् । समूह बी मा बहराइन, कुवेत, सिंगापुर, हङकङ र युएई रहेका छन् । हरेक समूहमा शीर्ष स्थानमा रहने दुई टोलीले सेमिफाइनल खेल्नेछन् । फाइनल जित्ने टिम एसिया कपका लागि छनोट हुनेछ ।
कुल २४ खेल हुने प्रतियोगिताको फाइनल खेल वैशाख १८ गते कीर्तिपुरमा हुनेछ । विश्वकप लिग २ मा नेपालले गत दुई महिनामा खेलेको १२ मध्ये ११ खेल जितेर विश्वकप छनोटमा पुगेको थियो । त्यसमध्ये घरेलु मैदानमा खेलेका सबै ८ खेल जितेकाले पनि नेपाललाई प्रिमियर कपको बलियो दाबेदारका रूपमा हेरिएको छ । तर, नेपालसँगै एकदिवसीय अन्तर्राष्ट्रिय मान्यताप्राप्त ओमान र यूएई पनि एसिया कपमा पुग्नका लागि बलियो चुनौती दिने हकदार टोली हुन् ।
सन् १९९६ मा सुरु भएको एसीसी ट्रफीदेखि नेपालले अन्तर्राष्ट्रिय प्रतियोगिता खेल्दै आएको छ । प्रिमियर कपअघिको प्रतियोगिता हो एसीसी ट्रफी । तर नेपालले एसीसी ट्रफीबाट कहिल्यै एसिया कपमा पुग्न सकेन । एसिया कप खेल्ने सपना पूरा गर्न यस पटक नेपालसामु हात राम्रैसँग खोल्ने उपयुक्त अवसर आएको छ ।
