म्यानचेस्टर सिटीको जितमा हालाण्डको कीर्तिमानी
काठमाडौँ । इङ्लिस प्रिमियर लिग फुटबलमा म्यानचेस्टर सिटी शीर्ष स्थानमा उक्लिएको छ । गए राति भएको खेलमा वेस्ट ह्याम युनाइटेडलाई ३–० गोलले हराएको सिटी आर्सनललाई पछि पार्दै शीर्ष स्थानमा उक्लिएको हो ।
सिटीको जितमा एर्लिङ हालाण्ड, नाथन एके र फिल फोडेनले गोल गरे । हालाण्डले प्रिमियर लिगको एकै सिजनमा सर्वाधिक ३५ गोल गर्दै कीर्तिमान बनाएका छन् । उनले ३३औं खेलमा यो कीर्तिमान बनाएका हुन् ।
जितसँगै सिटीले ३३ खेलमा २५ जितसहित ७९ अङ्क जोडेको छ । आर्सनलको ३४ खेलमा २४ जितसहित ७८ अङ्क छ । अर्को खेलमा लिभरपुलले फुलह्यामलाई १–० गोलले हराएको छ ।
