नागरिकता माग्दै माइतीघर मण्डलामा एक व्यक्तिले गरे आत्मदाहको प्रयास
काठमाडौँ । काठमाडौंको माइतीघर मण्डलमा एक व्यक्तिले आत्मदाहको प्रयास गरेका छन् । नागरिकता माग गर्दै आन्दोलनका क्रममा धर्ना बसेका निरज नामका व्यक्तिले जिउमा पेट्रोल खन्याएर आगो लगाएका हुन् ।
जिल्ला प्रहरी परिसर काठमाडौंका एसपी तथा प्रवक्ता सीताराम रिजालका अनुसार पेट्रोल खन्याएर ती व्यक्तिले आत्मदाह प्रयास गरेका हुन् । ‘एकजना व्यक्तिले पेट्रोल खन्याएर आत्मदाह प्रयास गरेका थिए’, उनले भने, ‘तर पूरा विवरण खुलिनसकेका ती व्यक्तिलाई तत्कालै उपचारका लागि ट्रमा सेन्टरमा पठाइएको छ ।’
जिउमा आगो लगाएर घाइते उनलाई प्रहरीले नियन्त्रणमा लिएर अस्पताल लगेको थियो । नागरिकताविहीन निरज नामका ती व्यक्तिको अवस्था खतरामुक्त रहेको जनाइएको छ । नागरिकताविहीन व्यक्तिले आत्मदाह प्रयास गरेपछि अहिले त्यहाँ सुरक्षा व्यवस्था कडा बनाइएको छ ।