नाइजेरियालाई हराउँदै इङल्याण्ड महिला विश्वकपको क्वार्टर फाइनलमा
काठमाडौँ । नाइजेरियालाई पेनाल्टी सुटआउटमा हराउँदै इङल्याण्ड फिफा महिला विश्वकप फुटबलको क्वार्टर फाइनलमा पुगेको छ ।
आज सोमवार अस्ट्रेलियाको सनकर्प स्टेडियममा भएको खेलमा नाइजेरियालाई पेनाल्टी सुटआउटमा ४–२ गोलले हराउँदै इङल्याण्ड क्वार्टर फाइनलमा पुगेको हो । निकै प्रतिस्पर्धात्मक खेलमा ९० मिनेटसम्म दुवै टोलीबाट गोल हुन नसकेपछि अतिरिक्त ३० मिनेट थप गरिएको थियो । थपिएको समयमा पनि गोल हुन नसकेपछि खेल पेनाल्टी सुटआउटमा पुगेको हो ।
खेलको ८७ औँ मिनेटमा इङल्याण्डकी लरेन जेम्स रातो कार्ड पाउँदै मैदानबाट बाहिरिएकी थिइन् । अब इङल्याण्डले क्वार्टर फाइनलमा कोलम्बिया र जमैकाबीचको विजेतासँग अगस्ट १२ मा खेल्ने छ । कोलम्बिया र जमैकाबीचको खेल भोलि (मंगलबार) हुँदैछ ।
