१५ वर्षीया किशोरी बलात्कार आरोपमा दुई किशोरसहित तीन जना पक्राउ
कञ्चनपुर । कञ्चनपुरको दोधारा चाँदनीबाट एक १५ वर्षीया किशोरीलाई जबरजस्ती करणी गरेको अभियोगमा तीन जना युवक पक्राउ परेका छन् ।
पक्राउ पर्नेमा दोधारा चाँदनी नगरपालिका–३ का १९ वर्षीय अरबिन महता, १७ र १८ वर्षका दुई किशोर छन् । जिल्ला प्रहरी कार्यालयका अनुसार दोधारा चाँदनी नगरपालिका–२ स्थित खेल मैदानमा लागेको मेला हेर्न गएको समयमा पहिलो पटक जबरजस्ती करणी गरेको किशोरीले उजुरीमा उल्लेख गरेकी छन् ।
यही भदौ १५ मा मेला हेर्न गएका बेला ललाईफकाई गरेर दोधारा चाँदनी नगरपालिका–४ बैतडा टोलस्थित उखुबारीमा करणी गरेको पीडितको भनाइ छ । भदौ १९ मा दोधारा चाँदनी नगरपालिका–१ मायापुरी सामुदायिक जंगलमा लगेर करणी गरेको किशोरीले जाहेरीमा उल्लेख गरेकी छन् । इलाका प्रहरी कार्यालयबाट खटिएको प्रहरी टोलीले आरोपितलाई नियन्त्रणमा लिएको छ । घटनाबारे थप अनुसन्धान भइरहेको प्रहरीले जनाएको छ ।
