एनएमबी बैंकका गार्ड मृत भेटिए, सुत्ने कोठा र शौचालय रगताम्मे
सिरहा । सिरहाको मिर्चैया–६ कटारी चोकस्थित एनएमबी बैंकका एक सुरक्षा गार्ड मृत्त भेटिएका छन् । उनी आज बिहान सुतेको कोठामा मृत फेला परेको बताइएको छ ।
प्रहरीका अनुसार ५७ वर्षीय नेत्रबहादुर गुरुङ बैंकको शाखा कार्यालय रहेको भवनको दोस्रो तल्लाको गार्ड कोठामा मृत फेला परेका हुन् । महोत्तरीको बर्दिबास घर भएका गुरुङ बैंक रहेको दोस्रो तल्लामा भित्रबाट फलामको चेट गेटमा ताल्चा लगाएको अवस्थामा सुत्ने कोठामा आज बिहान भेटिएका हुन् ।
सिरहाका प्रमुख जिल्ला अधिकारी राजेन्द्रदेव पाण्डेले प्रहरीको प्रारम्भिक अनुसन्धानबाट उनी भित्रबाट ताल्चा लगाएको अवस्थामा मृत फेला परेको बताए । इलाका प्रहरी कार्यालय मिर्चैयाका प्रमुख डिएसपी जितेन्द्रकुमार बस्नेतले गुरुङ मुटुको बिरामी रहेको विवरण प्राप्त भएको उल्लेख गरे ।
‘यसअघि उनको मुटुको एउटा भल्भ फेरिएको रहेछ,’ उनले सुनाए, ‘सिसिटिभी फुटेजको आधारमा हिजो उनले कार्यालय सरसफाई गर्ने क्रममा रगत बान्ता गरेको देखिएको छ । कुदेर बाथरुम छिरेको र त्यहाँ पनि बान्ता गरेको र सुत्ने कोठामा पुगेर पनि लगातार रगत बान्ता गरेका कारण मृत्यु भएको देखिन आएको छ ।’
