अशोक सिग्देलको दुईटा नागरिकता छ, तर विवरण फरक छैन : प्रधान सेनापति शर्मा
‘नेपाल आर्मी न्वारान गर्ने संस्था होइन’
काठमाडौं । प्रधान सेनापति प्रभुराम शर्माले जर्नेल अशोक सिग्देलको दुईटा नागरिकता भएको स्वीकार गरेका छन् ।
संसद्को राज्य व्यवस्था तथा सुशासन समितिको बैठकमा सांसदहरूले उठाएका प्रश्नको जवाफ दिँदै प्रधान सेनापति शर्माले जाजरकोट र रुपन्देहीको नागरिकतामा विवरण फरक नपरेको बताएका हुन् ।
‘अशोक सिग्देलको दुईटा नागरिकता छ । एउटा रूपन्देही र अर्को जाजरकोटबाट लिएको हो’, प्रधान सेनापति शर्माले भने, ‘तर सबै विवरण उस्तै छ । केही तलमाथि छैन ।’ उनले सेनाको विरोध गर्ने र बदनाम गराउने उद्धेश्यले विवादित विषय बाहिर ल्याइएको बताए ।
‘सेनाको विरोध गरेको छ, बदनाम गराउन खोजेको छ, एकोहोरो रटान मात्र छ’, शर्माले भने, थपे ‘सेनालाई गलत देखाउने तत्वहरूको खेल हो । जसले यो कुरा ल्यायो कारबाही हुनुपर्छ ।’ उनले बाहिर बसेर जे भन्दिए पनि छोड्दिन नहुने भन्दै गलत टिप्पणी गर्नेलाई कारबाही गर्ने कानुन चाहिएको बताए । सेनापति शर्माका अनुसार अरु निकायमा जस्तै सेनामा पनि जागिर खाने क्रममा उमेर प्रमाणित गर्न एसएलसीको प्रमाणपत्र, नागरिकता र क्यारेक्टर सर्टिफिकेटलाई हेर्ने गरिएको छ । उनले आक्रोशपूर्ण रुपमा भने, ‘सम्बन्धित निकायले नलिई नेपाल आर्मीले न्वारान गर्दैन । नेपाल आर्मी न्वारान गर्ने संस्था होइन ।’
