बालकुमारी घटनाको विरोधमा माइतीघरमा प्रदर्शन गर्ने सात जना पक्राउ (तस्वीरहरु)
काठमाडौं । प्रहरीले काठमाडौंको माइतीघरमा प्रदर्शन गर्ने सात जनालाई पक्राउ गरेको छ । हिजो (शुक्रबार) ललितपुरको बालकुमारीको प्रदर्शनमा दुई युवक मारिएको घटनामा गृहमन्त्रीले राजीनामा दिनुपर्ने माग राख्दै माइतीघरको निषेधित क्षेत्रमा आन्दोलन गर्नेलाई प्रहरीले नियन्त्रणमा लिएको हो ।
त्यहाँबाट हेमराज थापासहित सात जनालाई नियन्त्रणमा लिइएको काठमाडौं प्रहरी परिसरका प्रवक्ता एसपी कुमोध ढुंगेलले जानकारी दिएका छन् । स्थानीय प्रशासनले मंसिर ५ गते माइतीघरलाई एक महिनाका लागि निषेधित क्षेत्र तोकेको थियो । पुस ४ गते काठमाडौंका प्रमुख जिल्ला अधिकारी जितेन्द्र बस्नेतले थप दुई महिनाका लागि माइतीघरलाई निषेधित क्षेत्र तोकेका थिए ।