भारतले दियो नेपाललाई २९८ रनको लक्ष्य
काठमाडौं । आईसीसी १९ वर्षमुनिको विश्वकप क्रिकेटअन्तर्गत ‘सुपर सिक्स’ मा भारतले नेपाललाई २९८ रनको लक्ष्य दिएको छ ।
दक्षिण अफ्रिकाको ब्लोमफोन्टेनमा टस जितेर ब्याटिङ गरेको भारतले ५० ओभरमा ५ विकेट गुमाएर २९७ रन बनायो । भारतका दुई जना खेलाडीले शतक बनाए । सचिन दासले ११६ र कप्तान उदय शरन सय रन बनाएर आउट भए । भारतले ६२ रनमा ३ विकेट गुमाएको अवस्थामा सचिन र उदयले चौथो विकेटका लागि २ सय १५ रनको साझेदारी गरे । नेपालका गुलसन झाले ३ र आकाश चन्दले १ विकेट लिए ।
‘सुपर सिक्स’ मा नेपालको यो अन्तिम खेल हो । ‘सुपर सिक्स’ को पहिलो खेलमा नेपाल बङ्ग्लादेशसँग ५ विकेटले पराजित भएको थियो । नेपालको सेमिफाइनल पुग्ने सम्भावना ‘सुपर सिक्स’ अघि नै सकिएको थियो । समूह चरणको अन्तिम खेलमा अफगानिस्तानलाई १ विकेटले हराउँदै नेपाल ‘सुपर सिक्स’ मा पुगेको थियो । नेपाल समूह चरणमा पाकिस्तान र न्युजिल्यान्डसँग पराजित भएको थियो ।