रंगेली छोटी भन्सार : चिरिचट्ट भवन छ, २०६८ सालदेखि छैनन् कर्मचारी, गुम्दै राजश्व
मोरङ । मोरङको रंगेली छोटी भन्सार कार्यालय २०६८ सालदेखि कर्मचारीबिहीन छ । भन्सारमा कर्मचारी नभएपछि दैनिक संकलन हुने २० औँ हजार राजश्व गुमिरहेको छ ।
कर्मचारीका लागि भवन अभाव भएको र पुरानो भवन पनि जिर्ण बनेपछि ४ वर्षअघि आवाससहितको नयाँ भवन निर्माण गरिएको छ । भन्सार कार्यालयको ४ कट्ठा जग्गामा व्यवस्थित संरचनाहरू छन् तर कर्मचारी छैनन् ।
सीमावर्ती क्षेत्रमा रहेको सबैभन्दा जेठो भन्सार कार्यालय हो रंगेली तर कर्मचारी अभावमा राजश्व गुमिरहेको स्थानीय जयनाथ चौधरीले बताए ।‘ रंगेली र यसका आसपासका सयौँ मानिसले यहि बाटोबाट समान ओसार पसार गर्छन् । दैनिक २० हजार सम्म राजश्व संकलन हुने भन्सार १२ वर्षदेखि कर्मचारीबिहीन छ’, चौधरीले भने ।
कर्मचारी पठाउँदा पनि राजश्व अनुमान अनुसार नउठे पछि कर्मचारी फिर्ता गरिएको बिराटनगर भन्सार कार्यालय प्रमुख ज्ञानेन्द्रराज ढकालले बताए । स्थानीयले कर्मचारी काम गरेको खण्डमा तत्काल कर्मचारी पठाउन तयार रहेको ढकालले बताए । स्थानीय तहले पनि हालसम्म सो कार्यालयमा कर्मचारी माग गर्नका लागि कुनै पहल नगर्दा राजश्व गुमिरहेको हो ।
