महोत्तरीमा दुई समुदायबीच झडप : प्रहरीद्वारा हवाई फायर, तीन जना घाइते
महोत्तरी । महोत्तरीको सम्सी गाउँपालिका–२ स्थित महावीर झण्डा मेलाको अवसरमा निकालिएको कलश यात्राका क्रममा दुई समुदायबीच झडप भएको छ ।
ब्रह्मस्थान मन्दिरमा महावीर झण्डा मेलाको आज उद्घाटन गरिदैछ । मेलाको उद्घाटन अघि वडा नम्बर १ बाट कलश यात्रा निकालिएको थियो । कलश यात्रा मस्जिद भएको स्थानबाट गएको र त्यहाँ जय श्रीरामको नारा लगाएपछि मुस्लिम समुदायले विरोध गर्दा झडप भएको बताइएको छ । स्थित नियन्त्रणमा लिन प्रहरीले चार राउण्ड हवाई फायर गरेका छन् ।
प्रहरीले हवाई फायर गरेपछि भागदौड हुँदा तीन जना घाइते भएका छन् । मुस्लिम समुदायले मस्जिदमा ढुंगा हानेको आरोप लगाएको छ भने हिन्दुवादीहरूले ढुङ्गा प्रहार नभएको बताएका छन् । अहिले अवस्था सामान्य बनेको छ । सम्भावित घटनालाई मध्यनजर गर्दै त्यहाँ ठूलो संख्यामा सुरक्षाकर्मी परिचालन भएका छन् ।
