केजीएफ स्टार यशको अपोजिटमा करिना कपुर देखिँदै
मुम्बइ । केजीएफ फेम यश स्टारर फिल्म ‘टक्सिक’ चर्चामा छ । यो फिल्म आगामी अप्रिलमा रिलिज हुँदैछ । यस्तो अवस्थामा अब यो फिल्मको बारेमा नयाँ अपडेट आएको छ । ‘टक्सिक’ मा यशको अपोजिटमा करिना कपुर देखिने छिन् । यस कुराको पुष्टि स्वयम् करिना कपुरले गरेकी छिन् ।
करिना कपुरले हालै जुमसँग अन्तरक्रिया गरेकी छिन् । उनले आफू ठूलो बजेटको साउथ फिल्ममा देखिने बताइन् । यो प्यान इन्डिया फिल्म हुनेछ । कुराकानीको क्रममा करिना कपुरले भनिन्, ‘अहिले मैले भनेझैं म साउथको ठूलो फिल्म काम गर्न जाँदैछु । यो प्यान इन्डिया फिल्म हुने भएकाले यसको छायाँकन कहाँ हुनेछ ? भन्ने मलाई थाहा छैन । तर म पहिलो पटक यस्तो प्रोजेक्टमा आबद्ध छु भनी आफ्ना फ्यानहरूलाई बताउन पाउँदा निकै उत्साहित छु ।’
करिना कपुरले फिल्मको नाम भने खुलाइनन् तर उनले यसरी साउथको ठूलो फिल्मको कुरा गर्दा सीधै ‘टक्सिक’ तर्फ औंल्याएको भारतीय सञ्चारमाध्यमले उल्लेख गरेका छन । फ्यानहरूले यो भिडियो देख्ने बित्तिकै करिनाले यश स्टारर ‘टक्सिक’ फिल्मको बारेमा कुरा गरिरहेकी हुन् भन्ने अनुमान गर्न थालेका छन् । यस विषयमा निर्माताहरूबाट अहिलेसम्म कुनै आधिकारिक घोषणा आएको छैन ।
यश यसअघि ‘केजीएफ २’ मा देखिएका थिए । प्रशान्त नीलले निर्देशन गरेको यो फिल्मले विश्वभर १२ सय करोडभन्दा बढी कमाएको थियो । यशले डेढ वर्षपछि आफ्नो नयाँ फिल्म ‘टक्सिक’ घोषणा गरेका थिए । फिल्म ‘टक्सिक’ गोवाको पृष्ठभूमिमा आधारित हुनेछ । केजीएफ जस्तै यो पनि पीरियड क्राइम ड्रामा हुनेछ । ६० को दशकमा गोवामा रुसी र ड्रग्स माफियाको घुसपैठ थियो । यशको क्यारेक्टरले त्यहाँको रुसी वर्चस्वलाई कसरी चुनौती दिनेछन, फिल्मको कथा यसैको वरिपरि रहेको जनाइएको छ ।
केजीएफ सिरिज जस्तै यो फिल्म पनि एक्सन थ्रिलर हुनेछ । श्रोतका अनुसार यस फिल्ममा यश आफैं पनि निर्माता हुन् । यो पनि १०० करोडभन्दा माथिको बजेटमा समेटिएको छ । यशलाई फिल्मको कथानक यति धेरै मन परेको छ कि उनले अन्य प्रोजेक्टलाई छेउमा राखेर अहिले आफ्नो सम्पूर्ण ध्यान यसैमा केन्द्रित गरेका छन् । ड्रग्स र रुसी माफियाको साथमा हिप्पी संस्कृति जे थियो, त्यो सबै फिल्ममा देखाइने छ ।
