सप्तकोशीमा डुंगामा लैजाँदै गरेको १६४ किलो गाँजा बरामद
मोरङ । सप्तकोशीमा डुंगामा राखेर ओसारपसार गरिरहेको १६४ किलो गाँजा बरामद भएको छ । मध्यराति १ः३५ बजे सुनसरीको बराहक्षेत्र नगरपालिका–१ स्थित सप्तकोशी नदी किनारमा डुंगामा राखेर ल्याएको गाँजा बरामद भएको सशस्त्र प्रहरी बलका सहप्रवक्ता डिएसपी शैलेन्द्र थापाले जानकारी दिए ।
सप्तकोशी किनारमा केही व्यक्तिहरूले डुंगाबाट गाँजा निकाल्दै गरेको बेलामा सशस्त्र प्रहरी बल नेपाल सुरक्षा बेस चतराले गाँजा बरामद गरेको हो । सशस्त्र प्रहरी आएको थाहा पाएपछि उनीहरू गाँजा छाडेर फरार भएका थिए ।
बरामद भएको गाँजा थप अनुसन्धान तथा कारबाहीका लागि इलाका प्रहरी कार्यालय महेन्द्रनगर चक्रघट्टीमा बुझाइएको छ । सशस्त्र प्रहरी बल नेपाल नं ४ गणबाट फागुन १ गते देखि हाल सम्म १ एम्बुलेन्स सहित ५६४.४७५ किलो गाँजा बरामद भएको छ ।
