अबको गन्तव्य आर्थिक विकास र समृद्धि : अध्यक्ष दाहाल


प्रकाशित मिति : November 16, 2017

बुटवल: नेकपा (माओवादी केन्द्र)का अध्यक्ष पुष्पकमल दाहालले संविधानसभाबाट संविधान प्राप्त भइसकेपछि अबको गन्तव्य आर्थिक विकास र समृद्धि भएको बताएका छन् ।

‘राष्ट्रिय स्वाधीनताका लागि राष्ट्रिय अर्थतन्त्रः राष्ट्रिय अर्थतन्त्रका लागि राष्ट्रिय औद्योगिकरण तथा व्यापार विविधिकरण’ नारासहित भैरहवाको अञ्चलपुरमा चौथो राष्ट्रिय औद्योगिक व्यापार मेला कृषि तथा पर्यटन महोत्सवको आज उद्घाटन गर्दै उनले भने – “मुलुकको आर्थिक विकास, समृद्धि र स्थायित्वका लागि नै वाम गठबन्धन भएको छ ।”

अध्यक्ष दाहालले वाम गठबन्धन कसैका विरुद्ध नभएको बताउँदै “विकास र समृद्धिका लागि सबै क्षेत्रमा क्रान्तिकारी परिवर्तन ल्याउन वामपन्थीको जित आवश्यक छ,” भने ।

लुम्बिनीको बृहत्तर विकास गरी पर्यटनका माध्यमबाट जिल्लाको मात्र नभई समग्र देशकै आर्थिक समृद्धिमा योगदान पु¥याउन सकिने बताउँदै उनले आफू पहिलोपटक प्रधानमन्त्री हुँदा नै ल्हासादेखि लुम्बिनीसम्म रेल ल्याउने पहल गरेको र अब कोरलाबाट पनि रेल आउने सम्भावना रहेको धारणा व्यक्त गरे ।

अध्यक्ष दाहालले आर्थिक विकास र समृद्धिका लागि नेपालले चीन र भारत जस्ता विकसित मुलुकबाट लाभ लिन सक्नुपर्नेमा जोड दिदैं वाम गठबन्धनका तर्फबाट उम्मेदवार बनेकालाई जिताउन आग्रह समेत गरे ।नेकपा एमालेका उपमहासचिव घनश्याम भुसालले अबको पालो देश विकास र समृद्धि भएको बताए।नेपाल राष्ट्रिय उद्योग व्यापार संगठनका केन्द्रीय अध्यक्ष श्यामबहादुर पाठकले आत्मनिर्भर र स्वाधीन अर्थतन्त्र बनाउन देशभित्रको आन्तरिक उत्पादन बढाउनुपर्नेमा जोड दिए ।

मेला आयोजक समितिका संयोजक नारायणप्रसाद भण्डारीले स्वदेशी उत्पादनको बजार प्रवद्र्धन गर्ने, उद्योगी र उपभोक्ताबीच प्रत्यक्ष सम्पर्क स्थापित गराउने, उद्योगीमा प्रतिस्पर्धी क्षमता वृद्धि गर्न प्रेरित गर्ने तथा रुपन्देहीमा उद्योग, व्यापार, कृषि र पर्यटनको विकास र प्रवद्र्धनमा योगदान पु¥याउने लक्ष्यसहित मेला आयोजना गरिएको जानकारी दिए ।

मेलामा उद्योग, व्यापार, होटल÷रेष्टुराँ, सूचना प्रविधि, अटोमोबाइल्स, कृषि, पर्यटन र संघसंस्था तथा प्रायोजकका गरी करिब ४०० स्टल रहेका मूल आयोजक समितिका सहसंयोजक एंव स्टल दर्ता संयोजक खिमबहादुर खत्रीले जानकारी दिए ।

मेलाको आकर्षणका रुपमा यसपटक मेला प्रवेशद्वार ड्रागनको मुखाकृतिमा बनाइएको छ भने मेलामा राउटे जातिको कला संस्कृतिको अवलोकन गर्न पनि पाइने छ ।मंसिर ११ गतेसम्म सञ्चालन हुने मेलामा तीन लाखले अवलोकन गर्ने र रु ६० देखि ६५ करोडको आर्थिक कारोबार हुने लक्ष्य राखिएको कोषाध्यक्ष सचिन रोक्काले जानकारी दिए ।

यसअघि भैरहवाको बुद्धचोकबाट बाजागाजा, विभिन्न जनजातिका झाँकी, हात्तीसहित बृहत औद्योगिक जनचेतना ¥याली निकालिएको थियो ।

प्रतिक्रिया दिनुहोस्