‘शत्रु गते’ हेरेपछि नेता श्रेष्ठले भने, ‘माधवजीले पनि हेर्न जाऔँ भन्नुभयो, चलचित्र हेर्दा राम्रो पाएँ’
काठमाडौँ, २३ चैत । सधैँ राजनीतिक बैठक र कार्यक्रममा व्यस्त हुने दुई नेता आज साँझ नेपाली चलचित्र ‘शत्रु गते’ को दर्शक बन्न पुगेका छन् ।
नेकपा (एमाले)का वरिष्ठ नेता माधवकुमार नेपाल र नेकपा (माओवादी केन्द्र)का नेता नारायणकाजी श्रेष्ठ बागबजारस्थित सिटी म्याक्समा पुगेर दुई घण्टा ‘शत्रु गते’ हेरेका हुन् ।
चलचित्र हेरेपछि प्रतिक्रिया दिँदै नेता नेपालले चलचित्र सामाजिक परिवेशलाई आधार बनाएको हुनाले राम्रो सन्देश दिएको बताए । उनले चलचित्रले दाइजो प्रथा, घरछिमेकीसँगको सम्बन्धबारे जान दिएको बताए ।
आफू राम्रो सामाजिक घटना प्रधानका चलचित्र हेर्न गरेको बताउँदै उनले ‘शत्रु गते’ पनि राम्रो सुनेर हेर्न आएको बताए ।
यस्तै केन्द्रका नेता श्रेष्ठले चलचित्रबारे राम्रो सुनेकाले हेर्न आएको बताए । ‘चलचित्रका बारेमा बाहिर पनि राम्रो सुनेको थिएँ,’ उनले भने,‘माधवजीले पनि हेर्न जाऔँ भन्नुभयो । चलचित्र हेर्दा सामजिक विषयवस्तुमा राम्रो देखाइएको पाएँ ।’
दुई नेतासँग प्रदेश सांसद पशुपति चौलागाईं, रचना खड्का, मञ्जु यादव र युवा संघ नेपालका उपाध्यक्ष दिलु पन्तसमेत हेर्न पुगेका थिए ।