विश्वमै प्लाष्टिक प्रदूषणको प्रमुख कारण बन्यो कोका–कोला
काठमाडौं । विश्वव्यापी रूपमा वातावरणमा पाइने ब्रान्डेड प्लाष्टिक प्रदूषणमध्ये आधाभन्दा बढी ५६ कम्पनीबाट आएको अन्तर्राष्ट्रिय अनुसन्धानले देखाएको छ । बिहीबार प्रकाशित एक अध्ययनमा अस्ट्रेलियाको राष्ट्रिय विज्ञान एजेन्सी राष्ट्रमण्डल वैज्ञानिक र औद्योगिक अनुसन्धान संगठन (सीएसआइआरओ) लगायत १२ अन्तर्राष्ट्रिय संस्थाहरूले प्लाष्टिक प्रदूषणका लागि जिम्मेवारीको पहिलो मापन प्रदान गरेका छन् ।
८४ देशमा फैलिएको पाँच वर्षको प्लाष्टिक फोहोर अवलोकन कार्यक्रमको तथ्यांकमा आधारित अनुसन्धानमा सबै ब्रान्डेड प्लाष्टिक प्रदूषणको आधाभन्दा बढीका लागि ५६ कम्पनी र १३ कम्पनी प्रत्येक एक प्रतिशतभन्दा बढीका लागि जिम्मेवार रहेको पाइएको छ ।
कोका–कोला कम्पनी ब्रान्डेड प्लाष्टिक प्रदूषणको सबैभन्दा ठूलो उत्पादक रहेको छ । यसले विश्वव्यापी कूल प्रदूषणमा ११ प्रतिशत योगदान गर्दछ । त्यसपछि पेप्सीको पाँच प्रतिशत, नेस्ले र फ्रान्सेली खाद्य कम्पनी डेनोन प्रत्येकको तीन प्रतिशत रहेको पाइएको छ । सबै १३ कम्पनी कम्तीमा एक प्रतिशत खाना, पेय पदार्थ वा सुर्तीजन्य उत्पादनका लागि जिम्मेवार थिए । समग्रमा अनुसन्धानले वातावरणमा ब्रान्डेड र गैर–ब्रान्डेड प्लाष्टिक प्रदूषणको मात्रा ५०–५० मा विभाजित भएको फेला पारेको छ ।
अनुसन्धानकर्ताहरूले यस अनुसन्धानबाट प्लाष्टिक उत्पादन र प्लाष्टिक प्रदूषण बीचको स्पष्ट सम्बन्ध फेला पारेको बताएका छन् । उनीहरुले प्लाष्टिक उत्पादनमा एक–प्रतिशत वृद्धि हुदा वातावरणमा प्लाष्टिक प्रदूषण एक–प्रतिशत वृद्धि भएको पाइएको छ ।
यो अनुसन्धान पाँच वर्षसम्म ८४ देशहरूमा १५७६ अडिट घटनाहरूको डाटा प्रयोग गरेर गरिएको थियो । यस अनुसन्धानमा एक लाख भन्दा बढी स्वयंसेवकहरूले ब्रेक फ्री फ्रम प्लाष्टिक एपमार्फत दाता बुझाएका थिए ।
