तीन सातापछि शव आउँदा सिङ्गो गाउँ शोकमा
पर्वत, ५ असार । साथीहरुको कुटाइबाट मलेसियामा ज्यान गुमाएका पर्वतका युवा किशोर केसी (नसिब) को शव तीन हप्तापछि नेपाल ल्याइएको छ ।
पर्वतको मोदी गाउँपालिका–५, बाजुङ धमिलपानी गाउँका मृतक केसीको शव सोमबार बिहान घरमा आएको हो । गत जेठ १५ गते साथीहरुले कुटेरै केसीको हत्या गरेका थिए । मृतक केसीको सोमबार बिहान मोदीखोलामा दाहसंस्कार गरिएको छ । बाबु भीमबहादुर केसीले कान्छा छोरा नसिबको शवमा दागबत्ती दिएका छन् । रोजगारीका लागि विदेश गएका युवाको अल्पायुमै आफ्नै साथीले कुटेर हत्या गरेपछि सिंगो गाउँ शोकमा डुबेको छ ।
मृतकको शव गाउँमा आएपछि सयौँ गाउँले श्रद्धाञ्जली दिन पुगेका थिए । ‘सिंगो गाउँ नै शोकमा डुबेको थियो’, स्थानीयवासी तथा नेपाल कम्युनिष्ट पार्टी (नेकपा), पर्वतका नेता भक्त कँुवरले भने, ‘शव देखेपछि आँशु नझार्ने कोही भएन ।’ रोजगारीकै लागि मलेसिया पुगेका पूर्वी नेपालका चार जनाले नसिवमाथि आक्रमण गरेका थिए । सँगै काम गर्ने नेपाली युवाले कुटपिट गर्दा गम्भीर घाइते भएका केसीको मलेसियाको पुत्रोदय अस्पतालमा उपचारका क्रममा मृत्यु भएको थियो । साथीहरुले रडले प्रहार गर्दा केसीको पेटमा गहिरो चोट लागेको थियो ।
२० महिनाअघि रोजगारीका लागि मलेसिया पुगेका केसी परिवारका कान्छा सन्तान हुन् । उनी अविवाहित थिए । उनका पिता भीमबहादुर केसी पनि वैदेशिक रोजगारीमा जाने आउने गरिरहेका थिए । केसी कुटपिट गरी हत्या गर्ने साथीहरु चारै जना प्रहरी नियन्त्रणमा रहे पनि एक जनालाई दोषी देखाएर अन्य उम्केको पाइएको छ । चारै जना दोषी भए पनि एक जनालाई जिम्मेवारी स्वीकार गर्न लगाई अन्य रिहा भएको सूचना आएको नेता भक्त कँुवरले बताए । उनले भने, ‘अपराधमा चारै जना संलग्न भएकाले उनीहरुविरुद्ध कानूनी लडाई लड्नु पर्ने अवस्था आएको छ ।’