ब्रिटिश गोर्खामा नेपाली महिला : भर्तीबारे चासोसँगै, बढ्दै तयारी
काठमाडौं, ४ साउन । नेपाली महिलाहरूलाई ब्रिटिश सेना भर्ना लिने खबर सार्वजनिक भएसँगै कतिपय युवतीहरूले त्यसप्रति चासो देखाउन थालेका छन् ।
११ वर्षअघि बेलायती सेनामा भर्ना लिने चर्चा चलेपछि धरान–१५ की टिम्पल लिम्बूले भर्ना हुनका लागि तयारी तालिम गरिन् । तालिमपछि उनी र उनका श्रीमानले धरानमा पुरुषहरुका लागि ब्रिटिश सेनामा भर्ती हुनका लागि तयारी शारीरिक अभ्यास तालिम केन्द्र खोलेका छन् । महिलालाई भर्ती लिने खबर थाहा पाएका टिम्पलका चिनजानका युवतीहरूले फोन गरेर तालिमका लागि जानकारी लिइरहेका छन् ।
सहभागी
आगामी सन् २०२० देखि महिलाहरू पनि ब्रिटिश सेनामा भर्ना हुन पाउने खबर सुनेर टिम्पललाई खुशी लागेको छ । उनले भनिन्, ‘मेरो त उमेर गयो । यस्तो खालको अवसर छोरालाई मात्र दिने चलन छ । यो हटाउनु पर्छ । छोरीहरूले पनि यो अवसर पाएमा परिवारका लागि केही गर्ने मौका पाउँछन् ।’ ब्रिटिश सेनामा महिलाहरूलाई पनि भर्ती लिने खबर ११ वर्षअघि पनि चलेको थियो ।
यो खबरसँगै बेलायती सेनामा भर्नाका लागि शारीरिक अभ्यास तालिम प्रदेश एक अन्तर्गत पूर्वी पहाडी जिल्लाबाट करीब १५० भन्दा बढी महिलाहरूले एकै साथ धरानमा तालिम लिएको तालिममा सहभागी टिम्पल लिम्बूले बताइन् । उनले भनिन्, ‘हामी महिलालाई पनि सेनामा भर्ती हुने अवसर आयो भन्दा खुशी लाग्यो । गर्दै गरेको नोकरी पनि छोडेर तालिम लिन आएँ । कमाई राम्रो हुने परिवार र आफ्नो भविष्य पनि सुरक्षित हुने आशाले सेना जाने निर्णय गरेको थिए ।’
गाह्राे
तालिमका क्रममा महिलाहरूले सिटअप, पुसअप, दौडसँगै सैनिक शिक्षाको अभ्यास गरेको लिम्बूले बताइन् । शारीरिक अभ्यास तालिम निकै कठिन भयो । त्यसमध्ये पनि टिम्पललाई हेभिङ गर्न भने निकै गाह्राे भयो ।
यस्तो कठिनाइ भोग्दा बेलायती गोर्खा सैनिकमा भर्ना हुनका लागि पुर्खाहरूले र केटाहरूले कति धेरै दुःख गरेका रहेछन् भन्ने महसुस भएको टिम्पलले बताइन् । यसरी शारीरिक अभ्यास गरिरहँदा उनीहरूलाई हेर्ने मानिसको भिड लाग्थ्यो । टिम्पलले भनिन्, ‘केटीहरू पनि कुदेको हेर । ल, बुहारीहरू सबै लाहुरे हुने भए छोराहरूले को ल्याउने भन्दै बुढापाकाहरूले हामीहरूलाई जिस्क्याउँथे ।’
छनोट
महिलाहरूले ब्रिटिश सेनामा भर्ना हुने चर्चा चलेसँगै तयारी पनि गरे । तर उनीहरूलाई छनोट प्रक्रियामा समावेश गराइएन । भर्ना नलिएपछि आफूसँगै तालिममा सहभागी सबै साथीहरू निरास भएको टिम्पलले बताइन् । उनले भनिन्, ‘अभिभावकले छोरीहरूलाई बाहिर निस्कन हुँदैन । यस्तो तालिमहरू लिनु हुँदैन भन्ने चलन छ ।
त्यत्रो खर्च गरेर गएका थियौं । कति दुःख गरियो । पसिना धेरै बगाइयो तर पछि नलाने भनेको सुनेपछि धेरै रोएका थियौं । त्यो सम्झँदा अझै पनि नराम्रो लाग्छ । रुन आउँछ ।’ ब्रिटिश सेनामा भर्ती हुनका लागि धरानमा करीब ३० वटा भन्दा बढी पूर्व तयारी तालिमहरू सञ्चालनमा छन् । प्रदेश–१ र पश्चिम नेपालका युवाहरू धरानमा तालिम लिन आउने तालिम केन्द्रहरूले जानकारी दिएका छन् । बीबीसी
