प्रथम विश्वयुद्धको समाप्तिलाई सम्झिन विश्व नेताहरू फ्रान्समा {फोटो फिचर सहित}
पेरिस, २५ कार्तिक । पहिलो विश्वयुद्ध समाप्तिको एक सय वर्ष अवसर पारेर फ्रान्सको पेरिसमा विशेष कार्यक्रम आयोजना गरिएको छ । प्रथम विश्वयुद्ध अन्त्य भएको सम्झौतामा हस्ताक्षर गरिएको एकसय वर्ष पुगेको सम्झनामा पेरिसमा आयोजित एउटा समारोहमा विश्वका नेताहरू सहभागी भएका हुन् ।
आर्क डि ट्रीओम्फ स्मारकमा आयोजित स्मृतिसभामा अमेरिकी राष्ट्रपति डोनाल्ड ट्रम्प, रूसी राष्ट्रपति भ्लादिमिर पुटिन लगायत विश्वका दर्जनौँ नेता सहभागी छन् । प्रथम विश्व युद्ध सन् १९१४ को जुलाई २८ मा शुरू भएको थियो ।
सन् १९१४ देखि १९१८ सम्म चलेको प्रथम विश्व युद्धका क्रममा झण्डै ९७ लाख सैनिकहरूले ज्यान गुमाए भने करिब १ करोड गैरसैनिकहरू मारिएका थिए । प्रथम विश्व युद्ध शुरू भएको चार बर्षपछि सन् १९१८ को नोभेम्बर ११ मा समाप्त भएको थियो ।
कार्यक्रममा फ्रान्सका राष्ट्रपति इमानुएल म्याक्रोँले विश्व शान्तिका लागि संयुक्त रूपमा पहल गर्न आग्रह गरे । उनले भने, ‘एक आपसमा डर तथा भयको खेलभन्दा विश्वशान्तिका लागि हामी सबैको आशाको बाटो निर्माण गरौँ । यसका लागि संयुक्त पहलको थालनी गरौँ ।’
विश्वका झण्डै ७० देशका नेताहरू पहिलो विश्व युद्ध सकिएको १०० वर्ष पुगेको सम्झनामा आयोजित समारोहहरूमा सहभागी हुन फ्रान्स पुगेका छन् ।
तस्बिरहरु:ऐजेन्सी
