पहिलोपल्ट जुगल हिमालको सफल आरोहण
सिन्धुपाल्चोक, २७ चैत । काठमाण्डौबाट नजिक रहेको जुगल हिमालको पहिलो पटक सफल आरोहण गरिएको छ ।
सिन्धुपाल्चोक जिल्लाको जुगल गाउँपालिका– ३ गुम्बा गाउँमा अवस्थित जुगल हिमश्रृङ्खलामा पर्ने ६ हजार १५१ मिटर उचाइको ग्याल्जेन चुचुरोको प्रथम पटक सफल आरोहण भएको हो । ग्याल्जेन पिकसहित जुगल शृङ्खलामा ११ वटा चुचुरो पर्दछन् ।
हिमाल आरोहणमा समावेशी सगरमाथा आरोही माया गुरुङ, शर्मिला थापा र मिलन लामाले मंगलबार अपराह्न ५ बजेर २० मिनेटमा आरोहण गरेको जुगल गाउँपालिकाका अध्यक्ष होमनारायण श्रेष्ठले जानकारी दिए ।
नेपाल पर्यटन बोर्डका अनुसार उक्त हिमश्रृङ्खलामा हालसम्म पहिचान भएका ११ चुचुरामध्ये छ हजार २५६ मिटरदेखि ६ हजार ९६६ मिटर उचाइका आठ चुचुरा छन् ।
