नाडाललाई हराउँदै फेडेरर फाइनलमा
लण्डन, २८ असार । स्वीस खेलाडी रोजर फेडरर बेलायतमा जारी विम्बल्डन टेनिस प्रतियोगिताको फाइनलमा प्रवेश गरेका छन् ।
स्पेनिस खेलाडी रफायल नाडाललाई हराउँदै फेडरर उपाधि नजिक पुगेका हुन् । गएराति भएको खेलमा फेडेररले नाडाललाई ७–६, १–६, ६–३ र ६–४ को सेटमा पराजित गरेका हुन् ।
आइतबार हुने फाइनलमा उनले सर्बियन खेलाडी नोभाक जोकोविचसँग खेल्नेछन् । तेस्रो वरियताका नाडाललाई दोस्रो वरियताका फेडेररले पराजित गरेर सन् २००८ मा विम्बल्डनको फाइनलमा बेहोरेको हारको बदला समेत लिएका छन् ।
३७ वर्षीय फेडेररले अहिलेसम्म ८ पटक विम्बल्डन टेनिसको उपाधि जितेका छन् । उनी पुरुषतर्फ सबैभन्दा धेरै पटक विम्बल्डनको उपाधि जित्ने खेलाडी हुन् । यो पटक उपाधि जितेमा महिला एकलतर्फको कीर्तिमानसँग पनि उनले बराबरी गर्ने छन् ।
फाइनलमा पुगेका जोकोभिचले स्पेनका रोबर्टो बाउटिसा अगुट्लाई ६–२, ४–६, ६–३ र ६–२ को सेटमा पराजित गर्दै फाइनलमा स्थान सुरक्षित गरेका थिए । चार पटकका विम्बल्डन विजेता जोकोविच पाँचौं उपाधिको पर्खाइमा छन् । एजेन्सी
