गौरिकाले जितिन् चौथो स्वर्ण, बनाइन् नयाँ कीर्तिमान
काठमाडौं, २३ मंसिर । पौडी खेलाडी गौरिका सिंहले १३ औं दक्षिण एशियाली खेलकुद प्रतियोगिता (साग) मा चौथो स्वर्ण जित्दै नयाँ कीर्तिमान बनाएकी छन् । 
उनले १०० मिटर फ्रीस्टाइलमा स्वर्ण पदक जित्दै सागमा ४ वटा स्वर्ण पदक जितेकी हुन् । उनले एउटै सागमा चार स्वर्ण जित्ने कीर्तिमान बनाएकी छन् ।
गौरिकाले सोमबार १०० मिटर फ्रीस्टाइल ५८.१३ सेकेन्डमा पूरा गर्दै स्वर्ण पदक जितेकी हुन् । उनले भारतीय खेलाडी शिवांगी शर्मालाई पछि पार्दै चौथो स्वर्ण जितेकी हुन् । शिवांगीको समय ५८.१५ सेकेन्ड रह्यो ।
सागमा ४ स्वर्ण पदक जितेर तेक्वान्दो खेलाडी दीपक विष्टले सबैभन्दा धेरै स्वर्ण जित्ने खेलाडी बनेका थिए । गौरिकाले दीपकसँग कीर्तिमान बराबरी गरेकी छन् ।
दीपकले चार वटा सागबाट ४ स्वर्ण जितेका थिए भने गौरिकाले एकै सागमा जितेकी हुन् । १३ औं सागमा गौरिकाले ४ स्वर्ण, २ रजत र २ कास्य पदक जितेकी छन् । नेपालले चालु सागमा ४९ वटा स्वर्ण पदक जितेको छ ।
