कांग्रेसले आज संसद अवरोध नगर्ने
काठमाडौं, २८ माघ । प्रमुख प्रतिपक्षी दल नेपाली कांग्रेसले आज (मंगलबार) को संसद वैठकमा अवरोध नगर्ने भएको छ ।
सिंहदरबारस्थित संसदीय दलको कार्यालयमा बसेको बैठकले आजदेखि संसद सुचालु गर्न सहयोग गर्ने निर्णय गरेको हो । प्रतिनिधिसभा बैठक दिउँसो १ बजे बस्दैछ ।
‘आजदेखि संसद अवरोध गर्दैनौं, आफ्ना कुरा राखेर सदन सुचालु गर्न दिन्छौं,’ सांसद डिला संग्रौलाले भनिन् ।
कांग्रेसले आफ्ना संसदीय दलका उपनेता विजयकुमार गच्छदारलाई राजनीतिक प्रतिशोधको आधारमा अख्तियार दुरूपयोग अनुसन्धान आयोगले विशेष अदालतमा भ्रष्टाचार मुद्दा लगाएको भन्दै तीन दिनसम्म सदन अवरूद्ध गरेको थियो ।
सोमबार बसेको कांग्रेस केन्द्रीय समितिले संसद अवरूद्ध नगर्न निर्देशन दिएपछि संसदीय दलको बैठक राखेर सदन सुचालु गर्ने निर्णयमा कांग्रेस संसदीय दल पुगेको हो ।