मन्त्री नेम्वाङ्गका १०० दिन : नौ हजार पाँच सय खाडल पुरिए
काठमाडौं, १७ फागुन । भौतिक पूर्वाधार तथा यातायात मन्त्री बसन्तकुमार नेम्वाङले आफ्नो एक सय दिनमा दुई सय किलोमिटर सडक कालोपत्रे गरिएको जानकारी गराएका छन् ।
आफूले मन्त्रालय सम्हालेको एक सय दिन पुगेको अवसरमा पत्रकार सम्मेलन गरी मन्त्री नेम्वाङले सय दिनमा दुई सय किलोमिटर सडक कालोपत्रे, एक सय ३० किलोमिटर ग्राभेल र ६९ किलोमिटर नयाँ ट्रयाक खोलिएको जानकारी गराएका छन् । उनले सय दिनमा ४० वटा पक्की पुलको निर्माण कार्य सम्पन्न गरिएको बताएका छन् ।
काठमाडौं उपत्यकाका झण्डै २७ किलोमिटर सडकमा कालोपत्रे गरिएको र आउँदो असारमा सक्नेगरी थप ८५ किलोमिटर सडक कालोपत्रे गर्ने काम पनि भैरहेको मन्त्री नेम्वाङले जानकारी गराए ।
कोटेश्वरको जाम घटाउन चार लेन सडक थप गर्नको लागि पर्यटन मन्त्रालयबाट जग्गा प्राप्त भएको, चक्रपथ अन्तर्गत ग्वार्को चोक, सातदोबाटो चोक र नख्खु चोकमा फ्लाइ ओभरको डीपीआर तयार गर्नका लागि परामर्शदाता छनोट कार्य भइरहेको, सूर्यविनायक–धुलिखेल सडकखण्डलाई विस्तार तथा कोटेश्वर जडिबुटी चोकको ट्राफिक जामलाई दीर्घकालीन रुपमा समाधान गर्न फ्लाइओभर र अन्डरपास निर्माणका लागि जापान सरकारसँग समन्वय भइरहेको पनि मन्त्री नेम्वाङले जानकारी गराएका छन् ।
मन्त्री नेम्वाङले राष्ट्रिय गौरवका योजनाको काम प्रभावकारी बनाउन र रुग्ण अबस्थामा रहेका योजनाको काम अघि बढाउन बिशेष पहल गरिरहेको पनि बताएका छन् ।
यस्तै दुई किलोमिटर रेलमार्गको ट्रयाक खोलिएको र काठमाण्डौको खाल्डाखुल्डी पुर्नु आफ्नो मुख्य सफलता बताएका छन् । उनले एक सय दिनमा सडक विभागअन्तर्गत रहेका सडकहरुका ९ हजार ५ सय वटा खाल्डाखुल्डी पुरिएको जानकारी गराएका छन् ।
