३१ वर्ष जेठी प्रतिष्पर्धीलाई हराउँदै ११ वर्षीया बालिका ओलम्पिकमा छनौंट
काठमाडौं, २५ फागुन । खेलका लागि उमेर मात्र होइन कौशल पनि चाहिन्छ । यहि कुरा प्रमाणित गर्दै सिरियाकी ११ वर्षीया टेबल टेनिस खेलाडी हेन जाजा ओलम्पिक २०२० छनोट भएकी छन् ।
उनी टोकियो ओलम्पिककी कान्छी खेलाडी त बन्ने छिन् नै इतिहासकै कान्छी ओलम्पियनमध्ये एक पनि हुने छिन् ।
सिरियाका हेन जाजा गत साता जोर्डनको अम्मानमा भएको पश्चिम एसियाली ओलम्पिक छनोटमा लेबनानकी ४२ वर्षीया मरियाना साहाकियनलाई हराएकी थिइन् ।
‘हाम्री नायिका हेन जाजालाई बधाई !’ सिरियन ओलम्पिक कमिटीले फेसबुकमा लेखेको छ । ओलम्पिकमा टेबल टेनिसमा उमेरहद छैन । अन्तर्राष्ट्रिय टेबल टेनिस संघका अनुसार जाजा अहिले १५५औं स्थानमा छिन् ।
