उत्तर कोरियामा कोरोनाबाट दुई सय सैनिकको मृत्यु, किमको दावी, ‘हाम्रो देश कोरोनामुक्त’
कोरोनाबाट विश्वभर चार हजार बढीको मृत्यु, माल्दिभ्समा चुनावी कार्यक्रम स्थगित
काठमाडौं, २७ फागुन । उत्तर कोरियाली शासन किम जोङ उनले ‘हाम्रो देशमा कोरोना संक्रमण छैन’ भनेर दावी गरिरहेका बेला त्यहाँका दुई सय बढी सैनिकको कोरोनाका कारण ज्यान गएको खुलासा भएको छ ।
हङकङबाट प्रकाशित अंग्रेजी पत्रिका साउथ चाइना मर्निङ पोस्टको अनलाइनले उत्तर कोरियामा दुई सय सैनिकको कोरोना संक्रमणका कारण ज्यान गएको र हजारभन्दा बढी व्यक्तिलाई क्वारेन्टाइनमा राखिएको समाचार लेखेको छ ।
गत जनवरीदेखि फेब्रुअरी महिनासम्म कोरोना भाइरसका कारण उत्तर कोयिामा १८० सैनिकले ज्यान गुमाएका थिए । तीन हजार ७ सय सेनालाई क्वारेन्टाइनमा राखिएको सो अनलाइनले दावी गरेको छ ।
चीनको सीमामा खटिएका सेनामा कोरोना देखिएको वेलायत तथा दक्षिण कोरियाबाट प्रकाशित हुने मिडियाले दाबी समेत लेखेका छन् । कोरोना भाइरसका कारण सेनाको ज्यान गएकोबारे उत्तर कोरियाले हालसम्म कुनै प्रतिक्रिया दिएको छैन ।
उत्तर कोरियाले हालसम्म आफ्नो देशलाई कोरोना भाइरस मुक्त भनेर दाबी गर्दै आएको छ । केहि दिनअघि मात्र उत्तर कोरियाली शासक किम जोङ उनले दक्षिण कोरियामा जस्तो आफ्नो देशमा कोरोनाको संक्रमण नभएको बताएका थिए ।
दक्षिण कोरियाको समाचार संस्था योनहापले उत्तर कोरियाले १० हजार मानिसलाई क्वारेन्टाइनमा राखेकोमा यतिबेला ४ हजारलाई घर फर्काएको दाबी गरेको छ ।
सोमबार उत्तर कोरियाली पत्रिका रोदोङ सिनमुनले भनेको थियो, ‘कोरोनाको प्रकोप हाम्रो देशमा देखिएको छैन ।’ मृत्यु हुनेहरु निमोनिया, आस्थ्मा, ट्युबरक्लाइसिस र चिसो लाग्ने संकेतहरु देखिएको सो पत्रिकाले उल्लेख गरेको थियो ।
उत्तर कोरियाली सैनिकलाई कोरोनाबाट बच्न पर्याप्त उपाय अपनाउन आग्रह गरिएको छ । त्यसो नगरे दण्ड दिने चेतावनी दिएको पनि बताइएको छ । उत्तरका अधिकारीहरुले अस्वस्थ्य र रोगी सैनिकलाई राम्रो हेरचाह दिइरहेको दाबी गरेका छन् ।
कोरोनाबाट विश्वभर चार हजार भन्दा बढीको मृत्यु
कोभिड–१९ सङ्क्रमणको कारण ४ हजार भन्दा बढी व्यक्तिको मृत्यु भएको फ्रान्सेली समाचार संस्था एएफपीले मङ्गलबार जनाएको छ । यस भाइरसबाट एक लाख १४ हजार ४५८ जनामा सङ्क्रमण पुष्टि भएको छ । यसमध्ये ६४ हजार १२० जना निको भएर घर फर्किएका छन् ।
यस भाइरस सङ्क्रमणका कारण विश्वभरी चार हजार २७ व्यक्तिको मृत्यु भएको मङ्गलबार प्राप्त समाचारमा जनाइएको छ । बङ्गलादेश, अल्बानिया र पाराग्वेमा तीन ओटा नयाँ देशमा कोभिड–१९ का सङ्क्रमण देखिएपछि विश्वव्यापी स्वास्थ्य चुनौतीको चिन्ता बनेको कोरोना भाइरस संसार ११० देशमा फैलिएको विश्व स्वास्थ्य संगठन (डब्लुएचओ) ले जनाएको छ ।
गत वर्षको अन्त्यबाट यस भाइरसको सङ्क्रमण शुरु भएको चीनको हुबेई प्रान्त वुहानमा एकै दिनमा १७ व्यक्तिको मृत्यु भएपछि चीनभरी यस रोगबाट मृत्यु भएपछि तीन हजार १३६ पुगेको जनाइएको छ ।
एक दिनमा मारिएका १७ मध्ये १६ जना हुृबेईको प्रान्तीय राजधानी वुहानका रहेका जनाइएको छ । चीनमा कोरोना भाइरस सङ्क्रमणको कारण जनवरीको अन्त्यदेखि हालसम्म एकै दिनमा मृत्यु भएको यो सबैभन्दा कम संख्या भएको पनि समाचारमा जनाइएको छ ।
गत २४ घण्टा यी तीन देशमा कोरोना भाइरस सङ्क्रमण फैलिएको डब्लुएचओले सोमबार प्रकाशित एक विज्ञप्तिमा जनाएको छ । गत २४ घण्टामा विश्वभरी तीन हजार ९९३ मा यस भाइरसको थप सङ्क्रमण देखिएको डब्लुएचओले जानकारी दिएको हो ।
इटालीमा यस भाइरसको सङ्क्रमणपछि मृत्यु हुने व्यक्तिको संख्या ४६३ पुगेको जनाइएको छ । त्यसैगरी दक्षिण कोरियामा सात हजार ५१३ जना सङ्क्रमित रहेका र ५४ जनाको मृत्यु भएको जनाइएको छ ।
यसैबीच प्राप्त समाचार अनुसार इरानमा सात हजार १६१ जना सङ्क्रमित रहेका र २३७ व्यक्तिको मृत्यु भएको मङ्गलबार प्राप्त समाचारमा जनाइएको छ । विश्वका विभिन्न तथ्याङ्कबारे जानकारी राख्ने वेभसाइट वल्डोमिटरका अनुसार कोरोना भाइरसको सङ्क्रमणपछि उपचार गराएर घर फर्किनेको संख्या ९४ प्रतिशत रहेको छ ।
घातक कोरोना भाइरसबाट सङ्क्रमितको संख्या भारतमा ४७ पुगेको छ । भारतको स्वास्थ्य तथा परिवार कल्याण मन्त्रालयले मङ्गलबार जानकारी दिएको छ । मङ्गलबारसम्म ४७ जनामा कोरोना भाइरसको सङ्क्रमण भएको पुष्टि भएको एएनआईले जनाएको छ ।
उनीहरुमध्ये केरलाका तीन जनालाई पूर्ण उपचारपछि अस्पतालबाट फिर्ता गरिएको पनि सरकारी अधिकारीहरुले बताएका छन् । उता जर्मनीमा भने सङ्क्रमितको संख्या एक हजार नाघेको छ । रोबर्ट कोच इन्स्टिच्यूटले सोमबारसम्ममा एक हजार ११२ जना सङ्क्रमित भएको जनाएको छ ।
यसैबीच माल्दिभ्समा कोरोनाका कारण चुनावी कार्यक्रम स्थगित गरिएका छन् । बेलायतमा कोरोना भाइरस सङ्क्रमितको संख्या ३१९ पुगेको बेलायतका स्वास्थ्य अधिकारीहरूले बताएका छन् ।
आसन्न स्थानीय निकाय र महिला विकास समितिको निर्वाचनका लागि भइरहेको कार्यक्रमहरु स्थगित गरिएको अधिकारीहरुले बताएका छन् । उनीहरुका अनुसार माल्दिभ्समा अहिलेसम्म दुई जनामा सङ्क्रमण भएको पुष्टि भएको छ ।
जापानमा भने मृत्यु हुनेहरूको संख्या सोमबारसम्म १६ पुगेको छ । सङ्क्रमितको संख्या ५०५ पुगेको छ । स्थानीय समयअनुसार सोमबार बेलुका ८ः३० बजेसम्ममा थप १० जना बिरामी भेटिएका छन् । जापानको स्वास्थ्य मन्त्रालय र स्थानीय सरकारले टोकियोमा ७६ र ओशाकामा ५५ जना बिरामी रहेको जनाएका छन् ।
त्यसैगरी बेल्जियममा सङ्क्रमितको संख्या २३९ पुगेको छ भने हङ्कङमा ११५, प्यालेस्टाइनमा २५, मलेसियामा ११७, कुवेतमा ६५ र इन्डोननेसियामा १९ जनामा कोरोना भाइरसको सङ्क्रमण भएको पुष्टि भएको छ । कोरियामा रहेका आठ जना अमेरिकी सैनिकलाई पनि कोरोनाको सङ्क्रमण भएको छ । एजेन्सी
