भारतबाट नेपाल भित्रिने पश्चिमी जमुनाह नाका बन्द
बाँके, ९ चैत । भारतबाट नेपाल भित्रिने पश्चिमी नेपालको संवेदनशिल बाँकेको जमुनाह नाका एक साताका लागि बन्द गरिएको छ ।
कोरोना भाइरसको रोकथामको प्रयासमा दुवै देशका यात्रुहरुलाई जमुनाहा नाकाबाट आवतजावत गर्न आजबाट रोक लगाइएको बाँकेका प्रमुख जिल्ला अधिकारी कुमारबहादुर खड्काले जानकारी दिएका छन् । उनले भने, ‘सामानहरु आउँछन् तर यात्रुहरु आउन–जान पाउँदैनन् ।’
प्रजिअ खड्काले अत्यावश्यक सेवामा भने रोक नलगाइने बताएका छन् । भारतको बहराइच जिल्लाको रुपैडिहा बजारमा दुवै देशका अधिकारीहरुबीच आइतबार छलफल भएको थियो । छलफलमा बाँकेका प्रमुख जिल्ला अधिकारी खड्का र बहराइचका डिस्ट्रिक मजिस्ट्रेट (डीएम) सहभागी थिए ।
यसअघि दुवै देशका अधिकारीहरुबीच नेपालगञ्जमा भएको बैठकले जमुनाहा नाकाबाट आवत–जावत गर्नेहरुको स्वास्थ्य परीक्षण कडा बनाउने निर्णय गरेको थियो ।
भारतसँग जोडिएको खुल्ला सीमानाबाट दैनिक हजारौंको संख्यामा मानिसहरु आवतजावत गर्दा कोरोना संक्रमण फैलिने जोखिम बढेको छ । भारतमा कोरोना संक्रमण फैलिँदै गएपछि त्यहाँ कार्यरत नेपालीहरु धमाधम स्वदेश फर्किरहेका छन् ।
