नयाँ संक्रमित भेटिएनन्, ५८ हजार बढीको कोरोना परीक्षण
काठमाडौं, १८ बैसाख । हिजो (मंगलबारं प्रदेश–२ मा एकै दिन चार जना कोरोना संक्रमित भेटिएको भए पनि आज (बुधबार) भने नयाँ संक्रमित कोही भेटिएनन् ।
स्वास्थ्य तथा जनसंख्या मन्त्रालयले आज (बुधबार) नियमित पत्रकार सम्मेलनमार्फत कोही नयाँ संक्रमित फेला नपरेको जानकारी दिएको छ ।
हालसम्म नेपालमा ५७ जना संक्रमित फेला परेका छन् भने १६ जना स्वस्थ बनेर घर फर्किसकेका छन् । ४१ जनाको विभिन्न अस्पतालमा उपचार भइरहेको र सबैको स्वास्थ्य अवस्था सामान्य रहेको मन्त्रालयका प्रवक्ता डा. विकास देवकोटाले जानकारी दिए ।
डा. देवकोटाका अनुसार हालसम्म १२ हजार ११ जनाको पीसीआर परीक्षण र ४६ हजार ८६० जनाको आरडीटी परीक्षण गरिसकिएको छ । पछिल्लो २४ घण्टामा १ हजार ६८२ जनाको परीक्षण भएको छ ।
प्रदेश–१ मा ४९८५, प्रदेश–२ मा ५४५६, बागमती प्रदेशमा ८३६१, गण्डकी प्रदेशमा ५४११, प्रदेश ५ मा ३७९९, कर्णाली प्रदेशमा ५४३६ र सुदूरपश्चिम प्रदेशमा १३४११ जनाको आरडीटी परीक्षण गरिएको डा. देवकोटाले जानकारी दिएका छन् ।
