क्लिनिकभित्रै किशोरीलाई बलात्कार गर्न खोज्ने डाक्टर नक्कली
राजविराज, १० माघ : राजविराजस्थित एक क्लिनिकमा उपचारका लागि गएकी किशोरीमाथि बलात्कारको प्रयास गर्न खोज्ने डाक्टर नक्कली निक्लिएका छन् ।
क्लिनिकमा उपचारका लागि आएकी किशोरीलाई बलात्कार गर्न खोज्ने राजविराज–१ पडरियाका हृदयनारायण झा नक्कली डाक्टर भएको खुलेको छ ।
नेपाल र भारतमा औषधि पसल र क्लिनिकमा काम गरेको आधारमा उनले डेण्टल चिकित्सक बनेर स्थानीयलाई भ्रममा पार्दै आएको खुल्न आएको छ । किशोरीमाथि बलात्कार गर्न खोजेको भन्दै केही दिनअघि झालाई प्रहरीले पक्राउ गरेपछि घटना सार्वजनिक भएको हो । झाले डाक्टर बनेर १० वर्षदेखि राजविराज–७ मा आरती डेण्टल क्लिनिक सञ्चालन गर्दै आएका थिए । योग्यता र नेपाल मेडिकल काउन्सिलको लाइसेन्स नै नभएका झाले क्लिनिकमा बिरामी जाँच्ने तथा औषधि लेख्ने गरेका थिए ।
पक्राउ परेसँगै उनले क्लिनिकमा रहेको बोर्डबाट आफ्नो पहिचान मेटाउन लगाएका छन् । ‘डा. एचएन झा–डेन्टिस्ट’ लेखिएको भागलाई केरमेट गरिएको छ । प्रहरी नियन्त्रणमा रहेका झा डाक्टर नै नभएको मेडिकल काउन्सिलका सदस्य डा. कालु सिंहले बताएका छन् । ‘काउन्सिलको दर्ता सूचीमा हृदयनारायणको नाम नै छैन । उनले डाक्टर बनेर ठगी गर्दै आएको देखिन्छ’– डा सिंहले भने ।