बझाङ पहिरो : १७ घर पुरिए, बेपत्ता सातमध्ये तीन जनाको शव भेटियो
बझाङ, २० असार । बझाङको केदारस्युँ गाउँपालिका–८ मल्लेसीमा पहिरो जाँदा १७ घर पुरिएका छन् । पहिरोमा बेपत्ता सात जनामध्ये तीन जनाको शव भेटिएको प्रहरीले जानकारी दिएको छ । लगातारको वर्षापछि शुक्रबार राति १२ बजेतिर पहिरो गएको हो ।
११ वर्षकी सुन्ता जेठारा, ७ वर्षकी अस्मिता जेठारा र ११ वर्षका प्रयागराज जेठाराको शव भेटिएको छ भने अन्य चार जना अझै बेपत्ता रहेको वडाध्यक्ष गणेश बोहराले जानकारी दिएका छन् । बेपत्ता भएकाहरुमा ८० वर्षका दले जेठारा २० वर्षका जिरजा जेठारा, ४४ वर्षकी रामदेवी जेठारा र ७ वर्षकी शान्ता जेठारा छन् ।
पुरिएकी रामदेवी जेठाराका मृतक भेटिएका छोरा प्रयागराजसहित छोरी अस्मिता हुन् भने शान्ता बेपत्ता छन् । पुरिएका घरको पशु चौपायसहित खाद्यान धन सम्पति पनि क्षति भएको प्रमुख जिल्ला अधिकारी कमलराज भण्डारीले बताएका छन् ।
