मानबहादुर बने दलित समुदायबाट पहिलो सचिव
काठमाडौं, ३० असार । नेपाल सरकारको सचिव पदमा पहिलोपल्ट दलित समुदायका व्यक्ति पुगेका छन् । मन्त्रिपरिषदको सोमबारको बैठकले डा. मानबहादुर बीकेलाई सचिवमा बढुवा गरेको हो ।
लोकसेवा आयोगको अध्यक्ष उमेशनाथ मैनालीको अध्यक्षतामा रहेको बढुवा समितिको बैठकले सचिव बढुवाका लागि बीकेसँगै गोकर्णमणि दुवाडी र मधु मरासिनीको नाम सिफारिस गरेको थियो । तीनमध्येबाट बीके सचिव बढुवा भएका मन्त्रिपरिषद स्रोतले जनाएको छ । डा. बीके हाल युवा तथा खेलकुद मन्त्रालयमा थिए ।
खरिदारबाट सरकारी सेवामा प्रवेश गरेका डा. बीके ०६० सालमा दलित समुदायबाट पहिलो पटक प्रमुख जिल्ला अधिकारी (सीडीओ) बनेका थिए ।
बर्दिया, स्याङ्जा, चितवन, मकवानपुर, सिरहा, तनहुँलगायतका जिल्लामा सीडीओ भई काम गरेका उनी श्रम विभागको महानिर्देशक, कर्णाली प्रदेशको सामाजिक विकास मन्त्रालयको सचिव र प्रदेश ५ को प्रमुख सचिवको जिम्मेवारीमा रहेर काम गरिसकेका छन् ।
पाल्पाको निम्न वर्गीय परिवारमा जन्मिएका बीकेले ब्राण्डाइज युनिभर्सिटी अमेरिकाबाट पोस्ट डक्टरेट गरेका छन् । आजको सफलतालाई डा. बीकेले नियमित संघर्षको प्रतिफल भएको बताएका छन् ।