काठमाडौं उपत्यकामा थप ९८ जनामा कोरोना भाइरस संक्रमण
काठमाडौं, ३१ साउन । पछिल्लो २४ घण्टामा काठमाडौं उपत्यकामा थप ९८ जनामा कोरोना भाइरस संक्रमण पुष्टि भएको छ ।
आज देशभर थपिएका ४८६ संक्रमितमध्ये ९८ जना काठमाडौं उपत्यकाभित्रका रहेको स्वास्थ्य तथा जनसंख्या मन्त्रालयले जानकारी दिएको छ । आज काठमाडौंमा ८० जना, ललितपुरमा ९ र भक्तपुरमा ९ जना गरेर ९८ जना संक्रमित भेटिएका हुन् ।
यसअघि शुक्रवार काठमाडौंमा ८३ जना, ललितपुरमा ३० जना र भक्तपुरमा ६ कोरोना संक्रमित थपिएका थिए ।
यता नेपालमा पछिल्लो २४ घण्टामा थप ४६८ जनामा कोरोना भाइरस संक्रमण पुष्टि भएको छ ।
स्वास्थ्य तथा जनसंख्या मन्त्रालयले योसहित आज (शनिबार) सम्ममा नेपालमा संक्रमितको संख्या २६ हजार १९ पुगेको जानकारी दिएको छ । यो अवधिमा १२४ जना संक्रमणमुक्त भई डिस्चार्ज भएको मन्त्रालयका प्रवक्ता डा. जागेश्वर गौतमले बताएका छन् ।
देशभरका प्रयोगशालमा विगत २४ घण्टामा ११ हजार ४७ जनाको नमुना पिसिआर बिधिबाट परीक्षण गरिएको गौतमले जानकारी दिए ।
नेपालमा पछिल्लो २४ घण्टामा कोरोना भाइरस संक्रमणबाट तीन जनाको ज्यान गएको छ । पर्सा, धनुषा र कपिलबस्तुमा एक–एक जनाको मृत्यु भएको स्वास्थ्य तथा जनसंख्या मन्त्रालयले जनाएको छ । योसहित नेपालमा कोरोनाबाट ज्यान गुमाउनेको संख्या १०२ पुगेको छ ।
