तिब्बतमा पहिलोपल्ट चल्यो बुलेट ट्रेन
काठमाडौं, ११ असार । चीनले तिब्बतमा पहिलो पटक शुक्रबारबाट बुलेट ट्रेन शुरु गरेको छ । यो ट्रेन तिब्बतको राजधानी ल्हासा र चेंग्दुबीच शुरु भएको हो । भारतको अरुणाञ्चल प्रदेशको सीमा नजिकै रहेको यसको रुट ४३५ दशमलब ५ किलोमिटर लामो रहेको छ ।
यो रेल सेवा सिचुवान–तिब्बत रेलवेको मातहतमा रहेको बताइएको छ । तिब्बत स्वायत्त क्षेत्रमा शुक्रबार पहिलो पटक बिजुलीबाट सञ्चालित बुलेट ट्रेनको शुरुवात गरेको चीनको सरकारी समाचार एजेन्सी सिन्ह्वाले जनाएको छ ।
गत नोभेम्वरमा चीनका राष्ट्रपति शी जिनपिङ्गले तिब्बतमा नयाँ रेल परियोजनासम्बन्धी निर्देशन दिएका थिए । सिचुवान–तिब्बत रेलवे चेंग्दुबाट शुरु भएर तिब्बतमा टुगिंने बताइएको छ । यसले ल्हासा र चेंग्दुबीचको यात्रा ४८ घण्टा बाट घटेर १३ घण्टामा छोटिएको छ ।
अरुणाञ्चल प्रदेश दक्षिणी तिब्बतको हिस्सा भएको चीनले दाबी गर्दै आएको छ । वास्तविक नियन्त्रण रेखाको ३ हजार ४८८ किलोमिटरको सीमामा भारत र चीनबीच बिवाद रहँदै आएको छ । एजेन्सी
