मन्त्रीको प्रतिबद्धता : गण्डकीमा आगामी असोजसम्म ८० प्रतिशत नागरिकलाई खोप लगाउँछौं
बागलुङ, २७ साउन । गण्डकी प्रदेश सरकारका स्वास्थ्य तथा जनसंख्या मन्त्री मधुमायाँ अधिकारी गुरुङले आगामी असोजसम्म गण्डकीका सबै नागरिकलाई कोरोना विरुद्धको खोप लगाउने प्रतिबद्धता जनाएकी छन् ।
प्रदेश संगठन नेपाल बागलुङ शाखाले मंगलबार आयोजना गरेको पत्रकार सम्मेलनमा बोल्दै मन्त्री अधिकारीले आउँदो असोजसम्म १८ वर्ष माथिका ८० प्रतिशत नागरिकलाई खोप लगाउन सकिने बताएकी हुन् । उनले संघीय सरकारबाट खोप उपलब्ध हुने र प्रदेश सरकारले व्यवस्थापन गरेर सवै जिल्लाका नागरिकलाई खोप पुर्याउने बताइन् । मन्त्री अधिकारीले खोपलाई उमेर समूहका आधारमा व्यवस्थित गरिने बताइन् ।
कोरोनाको तेस्रो लहरलाई लक्षित गरेर प्रदेश सरकारले सवै अस्पतालहरुमा आइशोलेशन सेन्टर बनाउने र आवश्यक व्यवस्थापन गर्न सवैमा आग्रह गरिएको बताइन् । ‘तेस्रो भेरियन्ट सुरु हुने र बलबच्चाहरुमा केन्द्रित हुने विशेषज्ञहरुले बताएका छन् ।
मन्त्री अधिकारीले भनिन, ‘बालबालिकालाई कोरोनाबाट जोगाउन यसअघि नै सवै अस्पतालमा आइशोलेशन तयार गर्न भनिसकेका छौं । तेस्रो लहरबाट सजग हुनका लागि गण्डकी प्रदेश सरकार पूर्व तयारीमा लागेको छ । बालबालिकाका लागि लक्षित गरेर अस्पतालहरुमा चार वटा एनआइसियु बेड हुनुपर्छ भनेर काम गरिरहेको उनले बताइन् । मन्त्री अधिकारीले गण्डकी प्रदेशमा कोरोनाबाट मृत्यु हुनेहरुको परिवारलाई ५० हजार रुपैयाँ दिने निर्णय गरिएको बताएकी छन् । नयाँ पत्रिका दैनिकबाट
