मेलम्चीमा बाढीले थप तीन घर बगायो
सिन्धुपाल्चोक, २ भदौं । सिन्धुपाल्चोकको मेलम्चीमा बाढीले थप तीन घर बगाएको छ । गए राति वर्षासँगै आएको बाढीले मेलम्ची नगरपालिका–६ को तीन वटा घर बगाएको उपमेयर भगवती नेपालले जानकारी दिए ।
उनका अनुसार राति ठूलो पानी पर्दा खोलामा बाढी आएको थियो । यस अघि गएको साउन १६ गतेको बाढीका कारण उच्च जोखिममा परेका घरहरु गए रातिको बाढीले बगाएको उनले बताए । मेलम्ची नदीमा बाढी आइरहेकाले अन्य घरहरु पनि उच्च जोखिममा परेका छन् ।
विशेष गरी वडा नम्बर ६, ११ र १२ का केही घरहरु उच्च जोखिममा परेका छन् । गएको असार १ गते र साउन १६ गते मेलम्चीमा आएको बाढीले ठूलो नोक्सानी गरेको छ । बाढीमा परेर पाँच जनाको ज्यान गएको छ भने २० जना हराइरहेका छन् ।
