अमेरिकामा गर्भपतन अधिकारको माग, हजाराैंको प्रदर्शन
काठमाडौं, १८ असोज । गर्भपतनको अधिकार कटौती नगर्न माग गर्दै अमेरिकामा हजारौंले प्रदर्शन गरेका छन् । गर्भपतनको अधिकारलाई कानुनमा स्थापित गर्न माग गर्दै विगत केही दिनदेखि अमेरिकामा देशव्यापी प्रदर्शन भइरहेका छन् ।
गर्भपतनको संवैधानिक अधिकार कटौती हुनसक्ने आशंकामा गर्भपतन अधिकारका समर्थकले सबै राज्यमा दबाब स्वरुप प्रदर्शन गरेका हुन् । त्यहाँको सर्वोच्च अदालतमा गर्भपतनको मुद्दाको सुनुवाईको तयारी भइरहँदा प्रदर्शन चर्किएको हो । प्रदर्शनमा महिलाहरुको सहभागीता अत्यधिक छ ।
अबको केही महिनापछि नै त्यहाँको सर्वोच्च अदालतमा गर्भपतनसम्बन्धी मुद्दाको सुनुवाई हुने बीबीसीले उल्लेख गरेको छ । आइतबार राजधानी वासिङटन डीसीमा हजारौंले प्रदर्शन गरेका छन् । प्रदर्शनकारीहरुले ‘गर्भपतनलाई कानूनी मान्यता देऊ’ जस्ता व्यानर बोकेका थिए । त्यसक्रममा सर्वोच्च अदालततर्फ मार्चपास गरिएको थियो ।
अमेरिकामा गर्भपतनको अधिकारको विपक्षमा पनि आवाज उठ्दे आएको छ । ‘निर्दोष बालबालिकाको जीवन तिम्रो हातमा छ’ भन्दै केही मानिसले गर्भपतन अधिकारको विरुद्धमा समेत प्रदर्शन गरेका छन् ।
