परराष्ट्रमन्त्री खड्का आज सर्बिया जाँदै
काठमाडौं, २२ असोज । परराष्ट्रमन्त्री डा. नारायण खड्का आज (शुक्रबार) सर्बिया जाँदै छन् । मन्त्रिपरिषद् बैठकको निर्णयनुसार मन्त्री खड्का सर्बियामा हुने असंलग्न राष्ट्रहरूको शिखर सम्मेलनमा भाग लिन त्यसतर्फ प्रस्थान गर्न लागेका हुन् । उक्त बैठकमा १२० भन्दा बढी असंलग्न परराष्ट्र नीति अख्तियार गरेका राष्ट्रका परराष्ट्रमन्त्रीहरूको सहभागिता रहनेछ ।
मन्त्री खड्काको सचिवालयका अनुसार उनी राति ८ बजेर ५० मिनेटमा त्रिभुवन अन्तर्राष्ट्रिय विमानस्थलबाट सर्बियातर्फ प्रस्थान गर्नेछन् । मन्त्री खड्कासँगै निजी सचिव शिवानी बस्नेत, सहसचिव सेवा लम्साललगायत टोलीमा सहभागी हुनेछन् ।
मन्त्री खड्का शिखर सम्मेलनमा भाग लिन शनिबार त्यसतर्फ जाने तयारी थियो । तर, टिकट अभावका कारण आजै उड्नुपर्ने भएको हो । ‘खासमा भोलि उड्ने भन्ने थियो, तर टिकट नभएर उहाँ आजै जान लाग्नुभएको हो’, सचिवालय स्रोतले भन्यो ।
