गृहमन्त्री खाँणका भाइ रामकृष्ण बने रुपन्देही जिल्लाको कांग्रेस सभापति
रुपन्देही, ११ मंसिर । नेपाली कांग्रेस रुपन्देहीको सभापतिमा रामकृष्ण खाँण चयन भएका छन् । दुई कार्यकाल लगातार जिल्ला सचिव रहेका खाँण आगामी पाँच वर्षको लागि सर्वसम्मत रुपमा सभापति चयन भएका हुन् ।
रामकृष्ण गृहमन्त्री बालकृष्ण खाँणका भाइ हुन् । सभापतिसहित अरु पदाधिकारी र सदस्य पनि सर्वसम्मत गराउने जिल्लाका विभिन्न पक्षका नेताहरुबीच सहमति भएको थियो । जसअनुसार थानेश्वर घिमिरे र अनिता शाह जिल्ला उपसभापति बनेका छन् । घिमिरे संस्थापन इतर अर्थात पौडेल पक्षबाट उमेद्वार बन्ने तयारी गरेका थिए ।
सर्वसम्मत हुने भएपछि उपसभापति बस्न तयार भएका हुन् । अनिता शाह संघीय सांसद भरतकुमार शाहकी पत्नी हुन् । उनी पनि सक्रिय राजनीतिमा क्रियाशील छिन् । क्षेत्रीय अधिवेशन सकिएपछि जिल्ला सभापति अब्दुल रज्जाकले गृहमन्त्री बालकृष्ण खाँण, संघीय सांसद भरतकुमार शाह, पूर्व जिल्ला सभापति रामचन्द्र ढकाल लगायतका नेताबीच जिल्लाको नेतृत्व सर्वसम्मत गराउने सहमति गरेका थिए ।
जसअनुसार संस्थापन अर्थात देउवा पक्षले सभापति, एक सचिव र सहसचिव लिने सहमति भएको थियो । संस्थापन इतर अर्थात पौडेल पक्षले उपसभापति, एक सचिव र एक सहसचिव लिने र भरतकुमार शाह पक्षलाई उपसभापति दिने सहमति भएको थियो । तीन पक्षका नेताहरुबीच जिल्ला सदस्यहरुमा पनि भागवण्डा भएको छ । जिल्ला सचिव, सहसचिव लगायत कार्यसमितिहरुमा आवश्कता भन्दा बढी उमेदवारी परेकाले सर्वसम्मति प्रयास भइरहेको छ ।
