बाढीले काँडाघारी प्रहरी प्रभागको एक तला भवन डुब्यो, तीन वटा मोटरसाइकल बगायो
मनोहराको सुकुम्बासी बस्तीमा बाढी
काठमाडौँ । लगातारको भारी वर्षाका कारण काँडाघारीस्थित प्रहरी प्रभाग डुबानमा परेको छ । प्रभाग काँडाघारीको एक तलाको पूरै भाग डुबाएको जिल्ला प्रहरी परिसर काठमाडौंका एसपी दिनेशराज मैनालीले जानकारी दिए ।
प्रहरीको मेशको खाद्यान्न, भाँडावर्तन र फर्निचर बगाएको छ । कार्यालयसँगै राखिएको तीन वटा मोटरसाइकल पनि बगाएको छ । अविरल वर्षाको कारण मनोहरा खोला किनारका बस्तीमा धेरै क्षति पुगेको छ । बाढीका कारण अलपत्र मानिसहरु र चौपायालाई सुरक्षाकर्मीको सहयोगमा उद्दार गरिएको काँडाघारीका स्थानीय टंक पौडेलले जानकारी दिएका छन् ।
काँडाघारी प्रभागको बेस सेट भिजेर काम नगर्ने भएको जिल्ला प्रहरी परिसर काठमाडौंले जनाएको छ । स्थानीयको सहयोगमा प्रहरीले खहरे भन्दा माथी राडारबाट बाढीले अलपत्र परेका चार जनाको उद्दार गरेको छ । गोठाटारबाट ७ वटा गाडीलाई डुबानबाट बाहिर निकालिएको छ ।
काँडाघारीस्थित हरहर महादेव नजिकै सात जना मानिसहरु अलपत्र परेका छन् । अलपत्र परेकाहरुको उद्दार भइरहेको एसपी मैनालीले जानकारी दिए । डुबान स्थलमा नेपाल प्रहरी र शसस्त्र प्रहरी बलका उद्धारकर्मी खटिएका छन् । कागेश्वरी मनोहरा-७ विष्ट गाउँमा एक तलाका अधिकांश घरहरु डुबानमा परेका छन् । त्यहाँ उद्धारकर्मी परिचालन गरिएको छ ।