स्थानीय तहलाई आत्मनिर्भर संस्थाको रुपमा विकास गर्दै लैजानु पर्छ : प्रधानमन्त्री
काठमाडौं । प्रधानमन्त्री शेरबहादुर देउवाले स्थानीय तहलाई क्रमश आत्मनिर्भर संस्थाको रुपमा विकास गर्दै लैजानु पर्ने बताएका छन् ।
आज (सोमबार) काठमाडौंमा नेपाल नगरपालिका संघको ८औं राष्ट्रिय अधिवेशन उद्घाटन गर्दै प्रधानमन्त्री देउवाले स्थानीय तहको स्रोत र साधनको पहिचानका साथ उचित उपयोग गर्दै क्रमश आत्मनिर्भर संस्थाको रुपमा बिकास गर्दै लैजानुपर्नेमा जोड दिएका हुन् ।
जनताको अपेक्षा र आवश्यकताको उचित सम्बोधन हुने गरी स्रोत र साधनको उचित परिचालन गर्दै जनप्रतिनिधिको जनताप्रतिको दायित्व र जवाफदेहितालाई प्रभावकारी रुपमा पुरा गर्नुपर्ने देउवाले बताए । त्यस्तै प्रधानमन्त्री देउवाले स्थानीय तहलाई पारदर्शी र प्रविधिमैत्री बनाउँदै जनतालाई सहज रुपमा कार्य सम्पादन गर्नुपर्ने धारणा राखे ।
उनले स्थानीय तहबाट हुने कामको मूल्याङ्कनका आधारमा जनताले सरकारलाई हेर्ने दृष्टिकोण तय हुने भएकाले जनताको सेवामा प्रतिवद्ध हुनुपर्ने बताए । उनले मुलुकको बिकासका लागि आवश्यक पूर्वाधार निर्माणका लागि पनि स्थानीय तह गम्भीर हुनुपर्ने जिकिर गरे ।
