राष्ट्रपति पौडेलका गाउँलेले मनाए खुशीयाली
तनहुँ । मुलुकको तेस्रो राष्ट्रपतिमा रामचन्द्र पौडेल निर्वाचित भएपछि उनको जन्मगाउँ व्यास नगरपालिका–८ रिस्तीवासी खुशी भएका छन् । राष्ट्रपतिको निर्वाचनमा पौडेल निर्वाचित भएपछि रिस्तीवासीले आपसमा बधाई साटासाट गरेर खुशीयाली मनाएका हुन् ।
‘यस्तो खुशी मनाउने अवसर हामी रिस्तीवासीले अब कहिले पाइएला ?’ रिस्तीका रामप्रसाद मिश्रले भने, ‘त्यसैले अब यो मौकामा आपसमा बधाई साटासाट गरेर मनाएका हौँ । रिस्तीमा जन्मिएका व्यक्ति मुलुककै अभिभावक हुँदा खुशी नहुने कुरै भएन ।’
राष्ट्रपति पौडेलकै प्रेरणाबाट आफू पनि राजनीतिमा होमिएको मिश्रले बताए । राष्ट्रपति पौडेललाई स्थानीयले निष्ठावान्, त्यागी र आदर्शवादी नेताको रुपमा बुझ्ने गर्छन् ।
पञ्चायती व्यवस्था विरुद्ध पटक–पटक गरी करिब १४ वर्ष राजनीतिक बन्दीको रुपमा जेलमा परेका पौडेललाई राष्ट्र प्रमुखको रुपमा देख्न पाउँदा उनले गरेको त्याग र कर्मको कदर भएकोमा स्थानीय हर्षित छन् । स्थानीय ७६ वर्षीय कृष्णकान्त पौडेलले भने, ‘काम त भोलि पनि गरौँला । तर यस्तो खुशी मनाउने मौका फेरि आउने कुरा भएन । यो दिन कहिले आउला भन्ने थियो । बल्ल गाउँमा खुशी छाएको छ ।’
राष्ट्रपति पौडेललाई प्रत्यक्ष भेटेर बधाई दिन रिस्तीका स्थानीय केही नेता तथा अगुवा काठमाडौँ पुगी सकेका छन् । ‘यसै गाउँले जन्माएको त्यागी नेता राष्ट्रपति हुँदा पालिकावासी सबै खुशी छौं’, बधाई दिन काठमाडौँ पुगेका भएका व्यास नगरपालिका–८ का वडाध्यक्ष युवराज गुरुङले भने, ‘यसअघि हामीलाई यस्तो खुशी मनाउने मौका कहिल्यै मिलेको थिएन ।’ राष्ट्रपति पौडेलले संविधानको पूर्ण पालना गर्नेतर्फ आफूलाई विवादरहित तवरले प्रस्तुत गर्नेतर्फ अग्रसर हुनुपर्नेमा अध्यक्ष गुरुङले जोड दिए ।
पञ्चायती व्यवस्थाको विरोधमा लाग्दा तत्कालीन प्रशासनबाट बचाउन आफूले राष्ट्रपति पौडेललाई लुकाएर खाना खुवाएको सम्झना आँखाअघि झल्झली नाचेको राष्ट्रपति पौडेलको भाउजु नानीमायाले बताइन् । जनता र मुलुकको समृद्धिको लागि पटक–पटक जेल परेका देवरको ढिला भए पनि योगदानको कदर भएकोमा गर्व लागेको उनले बताइन् । ‘सङ्घर्षको बेला देवर बाबुले जनता र मुलुकको लागि मर्न समेत डराउनु हुँदैन भनेर भन्नुहुन्थ्यो’, नानीमायाले भनिन्, ‘अहिले यस्तो खुशीको दिन पनि देख्न पाइयो ।’
रिस्तीको बाहुनपोखरामा जन्मिएका पौडेल जेठा सन्तान हुन् । उनका पाँच भाइ र चार बहिनी छन् । राष्ट्रपति पौडेलले स्थानीय श्री कृष्णालय पाठशालाबाट अक्षरारम्भ, त्यसपछि लमजुङ दुराडाँडामा रहेको पाणिनी पाठशालाबाट प्राथमिक तहको शिक्षा पूरा गरेका थिए । निम्न माध्यमिक तहको शिक्षा भने उनले पोखरास्थित विन्धवासिनी माध्यमिक विद्यालयबाट लिएका हुन् । त्यसपछि काठमाडौँबाट एसएलसी उत्तीर्ण गरेका हुन् । पौडेलको रिस्ती र दमौलीको अमरापुरीमा घर छ । विसं २०४८ को आमनिर्वाचनमा विजयी भएपछि रिस्तीको घर छाडेर पौडेल परिवार काठमाडौँ बसाइ सरेको थियो । –पूर्ण विके-मिला दरै / रासस
