नेपाली यू–१९ क्रिकेट टोलीका सदस्य मगरलाई गृह जिल्लामा भव्य स्वागत
अर्घाखाँची । १९ वर्षमुनिको राष्ट्रिय क्रिकेट टोलीका सदस्य उत्तम थापा मगरलाई गृह जिल्ला अर्घाखाँचीको सन्धिखर्कमा भव्य स्वागत गरिएको छ । अर्घाखाँची क्रिकेट सङ्घको आयोजनामा स्थानीय युवाहरूले बाइक र्यालीसहित बजार परिक्रमा गराएर मगरको सम्मान गरेका हुन् ।
अर्घाखाँचीमा क्रिकेट खेलेर राष्ट्रिय टोलीमा परेर उत्कृष्ट खेल प्रदर्शन गरेको तथा अर्घाखाँचीको नाम राख्न सफल भएकोले खेलाडी मगरलाई सम्मान गरिएको अर्घाखाँची क्रिकेट सङ्घका अध्यक्ष ऋषि भट्टराईले बताए ।
केही दिनअघि मात्रै यो टोलीले यूएईलाई हराउँदै १९ वर्षमुनिको विश्व कपमा स्थान पक्का गरेको थियो । १९ वर्षमुनिको विश्व कप सन् २०२४ मा श्रीलङ्कामा हुँदैछ ।