साम्बाको गोलले हारबाट जोगियो नेपाल
काठमाडौं । बंगलादेशसँगको दुई मैत्रीपूर्ण अन्तर्राष्ट्रिय फुटबल खेलको श्रृंखलाअन्तर्गत पहिलो खेलमा नेपाली महिला राष्ट्रिय फुटबल टोलीले १–१ बराबरी खेलेको छ ।
दोस्रो हाफको इञ्जुरी समयको पहिलो मिनेटमा सावित्रा भण्डारी (साम्बा) ले गोल गर्दै खेल बराबरी गरेकी हुन् । त्यसअघि ६५औं मिनेटमा बंगलादेशले कप्तान सविना खातुनको गोलमा अग्रता लिएको थियो । त्यसपछि नेपालकी कप्तान तथा गोलरक्षक एन्जिला तुम्बापोले वन भर्सेस वनमा बंगलादेशी खेलाडीलाई निराश बनाएकी थिइन् ।
गएको वर्ष भदौमा काठमाडौँमा सम्पन्न साफ च्याम्पियनसिपको फाइनलपछि नेपाल र बंगलादेशले दुई वटा मैत्रीपूर्ण फुटबल खेल्न लागेका हुन् । पहिलो पटक साफ च्याम्पियनसिपको उपाधि जित्दा बंगलादेशले नेपाललाई ३–१ गोलले हराएको थियो । नेपालले अहिलेसम्म साफ च्याम्पियनसिपको उपाधि जित्न सकेको छैन । नेपाल र बंगलादेशबीच दोस्रो मैत्रीपूर्ण फुटबल पर्सी (आइतबार) हुनेछ ।