माधव नेपालको स्वीकारोक्ति : पार्टी चाहे जसरी अगाडि बढेन, पलायन बढ्यो
काठमाडौं । सत्तारुढ नेकपा एकीकृत समाजवादीका अध्यक्ष माधव नेपालले आफ्नो पार्टी आफूहरूले चाहेज सरी अगाडि बढ्न नसकेको स्वीकारेका छन् ।
आज (मंगलबार) बाट सुरु भएको पार्टीको केन्द्रीय कमिटीको बैठकमा राजनीतिक प्रस्ताव पेस गर्दै अध्यक्ष नेपालले पार्टी आफूहरूले चाहे जसरी अगाडि बढ्न नसकेको बताएका हुन् । उनले पार्टी पंक्तिमा निराशा, आलस्यता, निष्क्रियता र पलायन जस्ता कमजोरी देखिएको पनि उल्लेख गरेका छन् ।
‘पार्टी पंक्तिमा आलस्यता, निराशा, निष्क्रियता, पलायन जस्ता कमजोरी देखिएका छन् । यस प्रकारका कमजोरी देखिनुका विभिन्न कारणहरू छन्,’ उनले भनेका छन्, ‘सबभन्दा प्रमुख कारण पार्टीमै रहेका कतिपय व्यक्तिहरूबाट पार्टीको बदख्वाइँ गर्ने अनुशासनहीन र अराजक कार्य हो । यस्तो कार्य गर्ने केही व्यक्ति पार्टीबाट पलायन भएर गइसकेका छन् ।’ अध्यक्ष नेपालले गलत कामलाई विगतमा नियन्त्रण नगरिएको भए पनि अब छुट दिन नसकिने बताएका छन् ।