बैंकबाट पैसा निकाल्ने वित्तिकै दुई युवाले यसरी लुटे एक लाख
दाङ । दाङमा आज (बुधबार) दिउँसो एक लाख रुपैयाँ लुटेर भागेका दुई युवक पक्राउ परेका छन् । तुलसीपुरबाट एक लाख रुपैयाँ लुटेर भागेका दुई युवकलाई प्रहरीले पक्राउ गरेको हो ।
पक्राउ पर्नेमा तुलसीपुर उपमहानगरपालिका–५ सम्झना टोलका २१ वर्षीय आयुष विक र १८ वर्षीय सुनिल मगर रहेका इलाका प्रहरी कार्यालय तुलसीपुरले जनाएको छ । तुलसीपुर–८ का दिनेश वलीले बैंकबाट पैसा निकाले लगत्तै पिछा गरी उनीहरूले लुटेका थिए । पैसा लुटिएको खबर पाउना साथ इलाका प्रहरी कार्यालय तुलसीपुर, नयाँ बसपार्क र बेलुवा प्रहरी चौकीबाट प्रहरी परिचालन भएको थियो ।
तीन तर्फबाट प्रहरीले घेरा हालेर लुटेराको खोजी थालेको थियो । प्रहरीले पिछा गर्दै जाने क्रममा तुलसीपुर–१० राइखल्यान क्षेत्रबाट उनीहरूलाई पक्राउ गरेको हो । पक्राउ परेकाहरूमाथि अनुसन्धान हुन बाँकी रहेको प्रहरीले बताएको छ ।
